Serving senator wey be Wike deputy ask Tinubu to intervene afta APC no clear am for Senate primaries
Wia dis foto come from, Dr. Mrs. Ipalibo Harry Banigo
Di senator wey dey represent Rivers West Senatorial District, Senator Ipalibo Harry-Banigo don call on President Bola Tinubu and di All Progressives Congress (APC) to chook eye into her disqualification for di APC Senate primaries.
Senator Banigo wey be di immediate past deputy govnor of Rivers State na one of di four women wey currently dey di Senate and recently decamp from di Peoples Democratic Party (PDP) to di APC.
Di senator wey follow BBC News Pidgin tok ontop di mata tell her supporters to remain calm ova her disqualification for di APC Senate primaries and appeal to di National bodi of di APC to look into di mata and do right tin.
"Di point be say sometimes pipo no always understand national politics. Dem no understand say national politics na wia you get to bring out your best so you fit bring di best back to your state," she tell BBC News Pidgin.
She appeal to di APC "to look into dia mata and to do di right tin, becos I dey sure dem dey capable of putting di records right."
Wia dis foto come from, Dr. Mrs. Ipalibo Harry Banigo
Senator Banigo note say for situation wia di present 10th Senate get only four women as senators na good reason to bring back more women to get gender balance as President Tinubu bin tok at di beginning of di primaries say make di party encourage and support more women wey qualify to get di ticket.
"To be di only woman contestant na anoda reason why I dey call on di national party to look at dis in terms of equity, justice, fairness and gender.
"We get only four women for di 10th Senate of di Federal Republic of Nigeria and dis na a time wey we dey seek to add more. Dose wey dey dia already get a lot of legislative experience, a lot of oversight experience and representative experience, wey dem go need to build up on as dem go into dia second term, so dem go dey much more effective in terms of bringing back di dividends of democracy, instead of putting a green horn dia," she tok.
End of Di one wey oda users dey read well well
She add: "So dat na why I believe say our women at least suppose get dat opportunity for continuity, to consolidate wetin we don start.
"I believe say our president dey veri gender positive and gender sensitive. For im speech bifor di primaries, e bin don advocate for women to get di chance wia dem dey qualified."
Harry-Banigo wonder why she wey be serving senator go dey disqualified.
"I be serving senator, so dem suppose give me di first place and Ida women too suppose get di opportunity to consolidate wetin we don do." She tok.
Oda party members wey APC disqualify for Rivers State for di Senate primaries include Tammy Danagogo, former Secretary to di Rivers State Govment; Ojukaye Flag-Amachree, former director of Energy Security for di office of di National Security Adviser; Tein Jack-Rich wey be APC chieftain wey bin don contest for di govnorship position bifor.
Di committee bin clear Felix Obuah and Allwell Onyesoh wey dey loyal to FCT Minister Nyesom Wike, wey be di leader of di rainbow Coalition for Rivers State.
Di disqualifications dey come amid intense political realignments for Rivers State following recent defections from di Peoples Democratic Party (PDP) to di APC and Senator Ipalibo Banigo (Rivers West) and Senator Allwell Onyesoh (Rivers East) dey among dose wey recently join di APC.
Tori be say di screening process focus on eligibility criteria wey include party membership status, financial obligations, and oda constitutional requirements.
Di ones wey dey cleared na dem go participate for di primaries and dose wey no dey cleared fit appeal.
