چمن میں ایک گھر پر دھماکہ خیز مواد گرنے سے ایک شخص ہلاک، دو زخمی
بلوچستان کے سرحدی شہر چمن میں ایک گھر پر دھماکہ خیز مواد گرنے کے نتیجے میں کم از کم ایک شخص ہلاک اور دو زخمی ہو گئے ہیں۔
اس واقعے کے حوالے سے تاحال سرکاری سطح پر میڈیا کو کوئی تفصیلات فراہم نہیں کی گئیں۔ تاہم، سماجی رابطوں کی ویب سائٹس پر گردش کرنے والی ویڈیوز، جن کی بی بی سی تاحال آزادانہ طور پر تصدیق نہیں کر سکی، میں مقامی افراد پشتو زبان میں یہ کہتے ہوئے سنائی دے رہے ہیں کہ آج علی الصبح ایک گولہ ایک گھر پر آ کر گرا اور زور دار دھماکے سے پھٹ گیا۔
اس ضمن میں جب چمن میں مقامی حکام سے رابطہ کیا گیا تو انھوں نے کسی قسم کی معلومات فراہم نہیں کیں۔ تاہم، کوئٹہ میں ایک سینیئر سرکاری اہلکار نے نام ظاہر نہ کرنے کی شرط پر ایک گھر پر دھماکہ خیز مواد گرنے کی تصدیق کرتے ہوئے بتایا کہ یہ واقعہ چمن شہر سے چار سے پانچ کلومیٹر کے فاصلے پر کلی ٹھیکیدار میں پیش آیا، جہاں دھماکہ خیز مواد ایک گھر پر آ کر گرا۔
ان کا کہنا تھا کہ اس واقعے میں کم از کم ایک شخص ہلاک اور دو زخمی ہو گئے۔
چمن میں محکمہ صحت کے ایک اہلکار کے مطابق، دونوں زخمیوں کو ابتدائی طبی امداد کے لیے ڈسٹرکٹ ہیڈ کوارٹر ہسپتال منتقل کیا گیا، جہاں ابتدائی علاج کے بعد انھیں مزید علاج کے لیے کوئٹہ منتقل کر دیا گیا۔
سماجی رابطوں کی ویب سائٹس پر گردش کرنے والی ویڈیوز میں مقامی افراد یہ کہتے ہوئے بھی سنائی دیتے ہیں کہ کلی ٹھیکیدار میں یہ گولہ صبح چار بجے کے قریب ایک گھر پر آ کر گرا۔ ان کا کہنا ہے کہ دھماکہ اتنا شدید تھا کہ اس سے پورا گاؤں لرز اٹھا، جس کے باعث لوگ خوف و ہراس کا شکار ہو گئے اور صبح تک جاگتے رہے۔
مقامی افراد کے مطابق، دھماکے سے ایک گھر کو شدید نقصان پہنچا اور اس کا مہمان خانہ مکمل طور پر تباہ ہو گیا۔ دھماکے کے بعد علاقے کے لوگ موقع پر پہنچے اور ملبے تلے دبے افراد کو نکالنے کے لیے فوری طور پر امدادی کارروائیاں شروع کی گئیں۔ ملبے سے نکالے جانے والے افراد میں سے ایک شخص ہلاک ہو چکا تھا۔
خیال رہے کہ چمن کے سرحدی علاقے میں پاکستان اور افغانستان کی سیکیورٹی فورسز کے درمیان پیر کے روز ایک بار پھر جھڑپوں کا سلسلہ شروع ہوا تھا۔
