Popu adọọla ndị Afrịka aka na ntị megide ịkpa oke, dịka njem ya na-akụrụ ọnụ

Popu Leo adóọla ndị mmadụ aka na ntị megide ịkpa ókè na adịghị nhatanha, dịka njem onyeozi ya n'Afrịka na-abịa na njedebe, ma kpọkuo ndị ọchịchị Ekwitorịa Gini ka ha hụ na e ji akụnaụba mba ahụ na-elekọta mmadụ niile, na-abụghị naanị mmadụ ole na ole bara ọgaranya.

Mgbe ọ na-agwa onyeisiala bụ Teodoro Obiang Nguema Mbasogo okwu n'obi ọchịchị tinyere ndị ọrụ gọọmenti, òtù obodo na ndị nnọchiteanya mba ofesi, Popu kwuru na omume ndị a na-ebibi obodo.

Ekwitorịa Gini bụ mba bara ụba na mmanụ agbidi, mana ihe fọrọ obere ka o ruo ọkara ndị bi na ya ka na-ebi ndụ n'ụbịam, dịka Ụlọakụ Mbaụwa si kwuo. Òtù ndị na-ahụ maka ikike mmadụ eboola gọọmenti ebubo iji ego mmanụ mee ihe maka uru ndị na-achị achị, nakwa ọghọm nke ndị a na-achị achị.

Ọ rụtụrụ aka na-ụkọ ala, ihe oriri, ebe obibi, na ọrụ kwesịrị nsọpụrụ dịka ihe ndị ọzọ na-akpata nchegbu dị ukwuu, bụ nke ka na-egbochi mmepe.

Popu Leo gwara ndị ọchịchị Ekwitorịa Guini ka ha kwado ikpe ziri ezi ma zere ihe ọ kpọrọ "ndọrọndọrọ ọchịchị na-agba onwe ya ụkwụ."

Ka ọ dị ugbua, Onyeisiala Teodoro Obiang Nguema bụ onyendu kachasị nọọ ogologo oge n'ọkwa n'ụwa, dịka ọ nọrọla n'ọchịchị ihe fọrọ ntakịrị ka ọ bụrụ afọ iri anọ na asaa (47).

A na-ebo ọchịchị ya ebubo ịrụrụaka, imebi ikike mmadụ, na imegide ndị na-agba ya ụkwụ na ndọrọndọrọ ọchịchị, òtù obodo, na ndị ntaakụkọ.

Popu Leo XIV ga-aka ụka 'Mass' n'Angola dịka njem ya n'Afrịka na-aga n'ihu

Onyeisi ụka Katọlik n'ụwa niile bụ Popu Leo XIV ga-aka ụka 'mass' dị nsọ n'obodo Kilamba nke mba Angola n'ụbọchị Sọnde 19 Eprel 2026 dịka njem mbụ ya n'Afrịka na-aga n'ihu.

Dịka ụlọmgbasa ozi 'Vatican News' si kwuo, Popu Leo ga-agakwa njem nleta n'ebe a ma ama na mba ahụ dịka 'Shrine of Muxima, ebe ọ ga-edu ndị ụka Katọlik kwere ekwe n'ekpere 'Rosary'.

Na Mọnde, ọ ga-aga Saurimo, ebe ọ ga-eleta ndị agadi ma kaa ụka 'Mass', tupu ọ laghachi Luanda, iji mechie nleta ya n'Angola.

N'ụtụtụ Tuzde, a na-atụ anya na Popu ga-aga Equatorial Guinea bụ ebe ikpeazụ ọ ga-akwụsị njem ndịozi ya nke mbụ n'Afrịka.

Cheta na Popu Leo rutere Angola site n'ọdọụgbọelu mba ụwa nke Luanda tupu elekere atọ nke ehihie n'ụbọchị Satọde 18 Eprel 2026, dịka ọ nọrọ ụbọchị anọ na mba Kameruun.

Chetakwa na ọ bụ Onyeisiala João Manuel Gonçalves Lourenço, tinyere ụmụaka abụọ nyere ya okooko osisi nabatara Popu Leo n'ọdọụgbọelu mba ụwa nke Luanda mgbe o rutere na mba ahụ.

Popu Leo IV: Etu e si nabata ya na mba Kamerunu

Popu Leo XIV erutela Kamerunu maka ụkwụ nke abụọ na njem ya n'Africa, ka ọ gachara mba Ọljirịa.

Ndị nabatara ya n'ọdọụgbọelu Yaoundé Nsimalen International Airport gụnyere Praịm mịnịsta mba Kamerun bụ Josepgh Dion Ngute, Onye ji ọkwa Apostolic Nuncio na Kamerunu na Ekwitorịal, ndịisi ụka dị iche iche nakwa ọtụtụ ndị ụka katọlik ndị ọzọ.

Ka ọ dị ugbua, Popu Leo nọ na-enwe ọgbakọ udo n'ụlọụka Saint-Joseph Cathedrak dị na Bamenda ebe ọtụtụ mmadụ pụtara n'igwe ma nabata ya.

Arcbishọpụ Bamenda bụ Andrew Nkea kwuru na ọbịbịa Popu Leo ga-enye ndị obodo ahụ agha metụtara kemgbe ọtụtụ afọ olileanya.

Nkea kwuru na oge a bụ oge udo nye Bamenda.

Ngwa ngwa o mechara nke, Popu Leo ga-aka ka n'ọdọụgbọelu Bamenda ebe ọ ga-enye oziọma udo.

Popu Leo ga-aga obi ọchịchị mba Kamerun ebe ọ ga-anọ zute Onyeisiala Paul Biya nakwa ndịisi gọọmenti mba Kamerun.

Ọ ga-agakwa ụlọ ndị na-enweghị nne na nna dị n'isiobodo Kamerun, ma zute ndị Bishọpụ ụka Katọlik na mba ahụ.

Modestine Abomo bụ otu onye so n'otu ndị na-agba egwu bịara nabata, Popu Leo, kwuru na obi dị ya ụtọ na Popu Leo bịara njem na mba Kamerun.

O kwuru na ọ na-atụ anya na Popu ga-elebanye na mpaghara obodo ụfọdụ agha metụtara ma gbaa mbọ weta udo na kwụsị ogbugbu a na-egbe ndị mba Kamerun.

Ọ kọwara na ebubmobi ha bụ na ọbịbịa Popu Leo ga-eweta udo na mba Kamerun.

Popu Leo agwala ndịisi ọchịchị mba Kamerun ka ha gee ntị nye olu ụmụnwaanyị, ndị ntorobịa, nakwa na-ekweuchitere ndị ụwa na-atụ n'ọnụ n'ihi na ọ bụ ihe dị mkpa maka ọganihu obodo.

O kwuru na ndị ntorobịa dị oke mkpa n'obodo ma kwuo na akara aka Chukwu nyere ha bụ ihe dị mkpa.

Ọ kpọrọ oku ka gọọmenti tinye anya ma nye ndị ntorobịa iweta ezi agụmakwụkwọ, nye ha ọzụzụ iji hụ na ha etinyeghị aka na mpụ.

Popu Leo kwukwara na olu ụmụnwaanyị dị mkpa n'obodo ma kọwaa na ha nwere ọtụtụ uru ha na-aba nye mmepe obodo.

Cheta na dịka o meriri ntuliaka ọkwa onyeisiala nke ugboro asatọ ya, Onyeisiala Paul Biya kwere nkwa inye ụmụnwaanyị na ndị ntorobịa ohere iso n'ihe a na-eme n'ọchịchị ya.

Popu Leo kwuru okwu megide mpụ, nrụrụaka n'ụdị ọbụla ma kwuo mkpa ịkwanyere ikike ụmụafọ ugwu.