Украина яна Санкт-Петербуркка ҳужум қилди. Россия: "ҳужумлар мисли кўрилмаган"

Россия расмийларининг маълум қилишларича, Украина Санкт-Петербург ва унинг атрофига "мисли кўрилмаган ҳужум" уюштирган. Шаҳарда Россиянинг йиллик Халқаро Иқтисодий форумининг сўнгги куни ўтмоқда эди.

"Ленинград вилояти узра 140 дан ортиқ дрон уриб туширилган", деди губернатор Александр Дрозденко. Шаҳар ҳокими Александр Беглов эса уруш бошланганидан бери илк бор аҳолини уйдан чиқмасликка даъват қилди.

Украина президенти Зеленский Россиянинг қурол омборлари ва ҳарбий денгиз базасига зарба берилганини айтиб, бу Россия ҳужумларига адолатли жавоб эканлигини айтди.

Бу ҳужумлар Россия президенти Владимир Путин урушни тугатиш бўйича тўғридан-тўғри музокараларга чақирган Владимир Зеленский билан учрашишнинг "маъноси йўқ"лигини айтганидан бир кун ўтиб содир бўлди.

Зелеснкийга кўра, Украина дронлари Санкт-Петербург минтақасигача 1000 км масофани босиб ўтган ва "душман денгиз флотининг қурол-аслаҳа омборлари ва Кронштадтдаги базани" нишонга олган.

Ленинград вилояти губернатори Дрозденконинг сўзларига кўра, Украинанинг ҳужумлари ҳарбий объектда ёнғинга сабаб бўлган ва аҳоли эвакуация қилинмоқда. Шунингдек, у биноларга "аҳамиятсиз" зарар етказилганини айтди.

Зеленскийнинг сўзларига кўра, Краснодар ўлкасининг жанубида жойлашган нефт омбори ҳам Украинанинг зарбасигага учраган.

Мутахассисларга кўра, Россия босқини бошланганидан бери тўрт йил ичида Украина ўзининг мудофаа соҳасини ривожлантирган.

Киев эндиликда Россия ичкарисидаги нишонларга мунтазам равишда зарба бера олиш имконига эга ва энергетика инфратузилмаси ва нефть иншоотларини ҳужумга тутмоқда. Бу ўз навбатида Москванинг уруш машинасини ёқилғи билан таъминлаш имконларини чеклашига олиб келишига умид қилинмоқда.

Россия президенти Путин: "Зеленский билан урушни тугатиш бўйича учрашишдан маъно йўқ"

Россия президенти Владимир Путин Украина раҳбари урушни тугатиш бўйича юзма-юз музокаралар ўтказишни таклиф қилиши ортидан Володимир Зеленский билан учрашишнинг ҳеч қандай маъноси йўқлигини айтди.

Зеленский пайшанба куни Путин билан тўғридан-тўғри музокаралар ўтказишга чақирувчи очиқ хат эълон қилиб, Россиянинг 2022 йилда Украинага бостириб кириши билан бошланган урушнинг яна бир бор АҚШнинг диққат марказига айланишини "шунчаки кутиш ноўрин" эканлигини айтганди.

Украина президенти шунингдек, оташкесим талаб қилиб, ўз нутқида шижоат ва баъзан истеҳзоли оҳангда гапирди.

Путин бу чиқишни "қўполлик" дея таърифлади ва учрашув талабини рад этди. Шу билан бирга ҳар қандай оатшкесимдан олдин тинчлик музокаралари бўлиши кераклиги ҳақидаги мавқеини яна бир бор таъкидлади.

Санкт-Петербургдаги йиллик халқаро Иқтисодий форумда "Зеленскийнинг таклифини қабул қиладими", дея савол берилган вақти жаноб Путин "Ҳозирча бу каби учрашувдан ҳеч қандай маъно кўрмаяпман", деб жавоб берди.

"Бу юзма-юз учрашув учун шароит яратиш усулими ёки юзма-юз учрашувни ташкил қилмаслик усулими? Менимча, бу чиқиш иккинчиси", дея илова қилди у.

Путиннинг жавобини эшитган жаноб Зеленский Россия "яна урушни танламоқда", дея муносабат билдирди.

"У шунчаки урушни тугатишни истамайди. Менимча, дунёда кўпчилик бу жавобдан ҳафсаласи пир бўлди", деб ёзди у Telegram даги саҳифасида.

Зеленскийнинг мактуби ҳақида гапирар экан президент Путин отшкесим фақат Украинага кучларини қайта йиғишга имкон бериб, Москванинг Киевдан кутаётган ёнбосишларини жавобсиз қолдиришини айтди.

"Украинанинг ягона мақсади қуролли кучларимизнинг олдинга силжишини тўхтатиш. Лекин бизга келишувлар керак - олти ойга эмас, уч ойга эмас, балки узоқ муддатли келажак учун. Мутахассислар ишга киришиб, баъзи ечимларни топсинлар. Шундан сўнг биз учрашишимиз мумкин.", деди у.

Президент Путин урушни фақат Россия мақсадларига эришилгандан кейингина тугатишини айтди.

"Ҳарбий ҳаракатлар бир кун келиб тугайди, деб тахмин қиламиз. Шубҳасиз, уруш биз ўз мақсадларимизга эришганимиздан кейин тугайди."

Россиянинг ҳозирда талаби шуки, Украина Донецк, Луганск, Херсон ва Запорижия вилоятларидан чиқиб кетиши, шунингдек, НАТОга қўшилиш ҳаракатларидан воз кечиши керак.

Аммо Киев ҳар қандай ҳудудни ён беришдан воз кечмоқда ва Москвага ён босиш уни келажакда яна бостириб киришга ундайди, деб таъкидлаб келмоқда. Россиянинг тўлиқ кўламли босқини Қрим ярим оролини аннексия қилганидан саккиз йил ўтиб содир бўлганига ишора қилмоқда.

Зеленский ўз мактубида "26 йиллик ҳокимиятдан кейин Путиннинг ёши ўз таъсирини кўрсата бошлаганини" таъкидлаб, яқинда Украинанинг Россия ҳудудига, жумладан, пайшанба куни Санкт-Петербуркка ҳужумларини у ерга "ташриф буюриш", дея истеҳзо билан гапирган.

Путиннинг айтишича, мактубда "баъзи қўпол гаплар" бор.

Зеленскийнинг мактубининг мазмуни баъзи доираларда, жумладан, Оқ уйда тинчликка умид уйғотган.

АҚШ президенти Доналд Трамп икки етакчи учрашса, "жуда яхши бўларди", деган.

Украина жума, 5- июн куни Азов денгизида ва Россия томонидан босиб олинган ҳудудларнинг қирғоқбўйи сувларида ноқонуний юк ортилган бешта кемага зарба берганини маълум қилди.

Украинанинг дрон ҳужумлари қўмондони Роберт Бровди бу кемалар Украина донини "ўғирлаш" ва ёқилғи ва ҳарбий буюмларни ташишда иштирок этганини айтди.

Озарбайжон Ташқи ишлар вазирлиги Азов денгизидаги иккита кемага қилинган ҳужумларда беш киши ҳалок бўлганини маълум қилди. Ҳужумни ким амалга оширгани айтилмаган, аммо кемалар Озарбайжонга тегишли эмаслиги билдирилган.

Украина томонидан учирилган битта дрон Руминиянинг Қора денгиз соҳилидаги Констанса портида портлади. Украина операторлари унинг Россия электрон аралашуви туфайли йўналишдан адашганини айтишди.

Украина расмийлари Россиянинг охирги кунлардаги қатор ҳужумларида камида 13 киши ҳалок бўлгани ва 70 киши жароҳат олганини айтишган.

Киев яқинидаги сут қадоқлаш корхонасига ҳужумда тўрт киши ҳалок бўлгани, Херсондаги ёқилғи қуйиш шохобчасига дрон ҳужуми натижасида 35 ёшли аёл ҳалок бўлгани билдирилган.