Cerddi Rownd 2 2026
Pennill bachog yn mynegi sicrwydd
Y Glêr
Rwy’n tybio y bydd dinas
A’i hegni hi’n parhau;
Yn amau na all stormydd
Ar lan, er amlhau,
Ymddatod holl gymhlethdod
Y concrit newydd hwn;
Ond am symylrwydd oesol
Y mynydd, wel, mi wn.
Hywel Griffiths 9
Tafarn y Vale
Rwy’n siŵr fy mod i’n sicr ,
Yn saff, mor saff â’r graig;
Ond aros eiliad eto -
Gwell i fi holi’r wraig.
Iwan Thomas 8.5
Cwpled caeth: Beddargraff awdur nofelau ditectif
Y Glêr
Trwm yw eironi’r hiraeth:
Ni ŵyr, yn y nef, pwy wnaeth.
Hywel Griffiths 8.5
Tafarn y Vale
Er amau mil, gwaetha’r modd,
Ni wyddys pwy a’i lladdodd.
Gareth Ioan 9
Limrig yn cynnwys y llinell ‘Mae tipyn go lew o ddyfalu’
Y Glêr
Mae tipyn go lew o ddyfalu
pwy fydd yn cael trafferth ynganu
y ‘feidir’ a’r ‘iet’
pan fyddan nhw’n blèt –
rhof fèt ar bob parti llefaru.
Megan Elenid 8
Tafarn y Vale
Pob noson wrth droi am y gwely,
Mae 'na dipyn go lew o ddyfalu.
Ti am fod ar dop?
Neu lice ti swop?
Da ‘bunkbed’ mae’n job penderfynu.
Iwan Thomas 9
Cadwyn o dri englyn unodl union yn canu mawl i rywun neu rywbeth
Y Glêr
Llwyd nawr yw darlledu i ni – a’r yrfa
Fawr hirfaith ar dewi,
Llwyd ryfedd y tonfeddi,
A llwyd di-ball DAB.
Y BBC, o’i ddawn siŵr – sy heno’n
Atseinio gan gryfdwr
A grafitàs y baswr
Yn holi stori’n ddi-stŵr.
Di-stŵr holwr gwineulwyd – y genedl,
Yn gynnes ddiarswyd,
Y pŵer, y syberwyd,
Y didwyll lais, Dewi Llwyd.
Eurig Salisbury 9.5
Tafarn y Vale
10 mlynedd oddi ar Euro 2016
Aeth y dorf yn ddiobaith, do. Aethant
ar daith heb freuddwydio
am weld Cymru yn rhuo
ar dir yn ninas Bordeaux.
O Bordeaux daeth rhyfeddodau, - â Bale
yn bwlio’r holl dimau
o rownd i rownd gan barhau,
a Hal ymhlith y goliau!
Gôl ar ôl gol yn annog iaith - a’r dorf
ar dân ar eu hymdaith.
Rôl gwledd, daeth diwedd y daith,
a neb yn byw’n ddiobaith.
Ianto Jones 9
Pennill telyn yn cynnwys y llinell ‘Nid yw hynny’n hanner digon’
Y Glêr
Er bod pasta lond y sosban
a bisgedi ffein i’w sgwlcan,
pan fo’i thŷ yn llawn o wyrion,
nid yw hynny’n hanner digon.
Megan Elenid 9
Tafarn y Vale
Rwyf yn caru lodes landeg,
Iddi rwyf fel gwas yn rhedeg;
Er rhoi iddi serch fy nghalon
Nid yw hynny’n hanner digon.
Gareth Ioan 8.5
Cân ysgafn: Ymosodiad Seiber
Y Glêr
Ym Mhwyllgor Trysoryddion Canghennau Ystrad-llan
O Ferched y Wawr un noson, aeth pethau ddim tw plan,
A hynny am i Glenda, sy ar yr aps o hyd,
Roi’r ddolen Zoom ar TikTok i’w gweld gan bawb drwy’r byd.
Ni sylwodd Faye’r Cadeirydd nes logio mewn i’r we –
‘Rhy hwyr, fe fwriwn ati.’ Beth allai fynd o’i le?
Roedd pethau’n mynd yn esmwyth, nes nododd Josephine
Fod gwall yn y cofnodion – dwy ‘n’ lle doedd ond un –
A thorrodd sŵn bytheirio ffieiddgas ar eu clyw!
Ai haciwr seiber ydoedd? Na, Barbra, hi sy’n byw
Yn Hafan Deg. Medd Faye, ‘Nawr, Barbra, sa’i moyn trwbwl.
Os ’sdim byd da ’da chi i’w weud, plis, peidiwch â’i weud o gwbwl.’
Ond yna torrwyd ar ei thraws gan res o luniau blin –
’Mond Moira am ryw reswm yn trio rhannu sgrin.
Ac yna sŵn anadlu a darfodd – ai hen dôn
Rhyw hwdlym oedd? Na, Gwladys heb fiwtio’i meicroffôn.
Ychydig, wir, a wyddai Faye fod haciwr yn eu plith,
Ysbïwr draw ym Mosgo’n clustfeinio fel rhyw rith,
Ond buan y gadawodd – ‘Mae’n rhaid bod feirws cas
Yn gwarchod system y nytyrs hyn. Se well ’mi logio mas.’
Eurig Salisbury 9
Tafarn y Vale
Wel Moses Annwyl, yffarn dân – mae rhywbeth mowr o’i le -
Hen haciwr dwl ‘di ffindio’i ffordd i’r system, dros y we…
Mae mainframe yr Eisteddfod wedi sgramblo’n rhacs trwy’r trwch,
A’r cyfan wedi cawlio - mae’r siop di mynd trwy’r hwch!
Mae’r bots yn sarnu’r cwbwl, pob cynllun sydd ar chwâl,
A’r Garreg Las di symud dros y Teifi i Benrhiw-pâl.
Ymhlith y cystadlaethau nawr mae awdl talcen slip,
Ac unawd i bensiynwyr sydd yn disgwyl glin neu hip.
Mae bownsars diogelwch wedi bwco i’r gymanfa,
Ac headline act Maes B Nos Iau yw Ysgol Sul Bethania;
A diawl, rhyw ffordd neu’i gilydd, mae’n ymddangos erbyn hyn
Bod neb ‘di cofio entro Gwobr Goffa Llwyd o’r Bryn.
Holl gwrw ‘Williams-Parry’, mae ‘di ganslo do fy ngwir i,
Bydd syched Arab ar bob un - fel sîn o’r Kalahari!
A dyma’r peth rhyfedda (fe goelith neb o hyn),
Mae’r Babell Lên ‘di gwerthu mâs…i ddarlith Ceri Wyn!
Rhyw ail go wael am limric bydd gwobr Eurig-fardd…
A hwrdd o Ddyffryn Aeron bydd yn hawlio’r gadair hardd!
O Betsan Moses annwyl, maddeua’r haciwr ffôl;
Ond na’r cyfle gore gês ‘riôd i ennill unrhyw stôl!
Iwan Thomas 10
Ateb llinell ar y pryd - Yn Synod Inn, syniad da
Y Glêr
Yn Synod Inn, syniad da
Yw gyrru yn go ara
Hywel Griffiths
Tafarn y Vale
Mewn cwrdd yr es i hwrdda
Yn Synod Inn, syniad da
Iwan Thomas 0.5
Telyneg (heb fod dros 18 llinell): Gweithdy
Y Glêr
Doedd y lle ddim yn yfflon,
ddim o bell ffordd.
Ambell hoelen gam, falle,
yn llechu’n y blawd llif a’r lludw,
a hwyrach fod y creithiau ar y fainc
lle llithrai’r llif
yn ddyfnach nag y tybiais.
Ac eto, wrth i haul y prynhawn
bowlio’n bert drwy’r ffenestri,
hawdd i mi oedd gweld
y pinc a’r oren a’r gwyrdd
yn esgyn o’r olew du ar lawr
ac yn asio â’i wreichion yntau,
heb aros i feddwl
nad oedd y rhain mor amlwg
i’r un â’r mwgwd weldio’n
dynn amdano.
Megan Elenid 9.5
Tafarn y Vale
Twriaf yn y pic-a-mics
o sgriwiau a bolltiau
yn nroriau’r cawdel.
Bydd e ‘ma rhywle...
Arogl weldio’n dew,
yn glynu i ‘nillad,
anhrefn cyfarwydd
y silffoedd yn fy meddwi.
Mae e ‘ma rhywle...
Mygiau gwag
yn rhes ar ffenest,
â’r olion olew’n bodio’r cof.
Eisteddaf
ar hen focs-tŵls,
ac yng ngwres y sbarcs,
yn sŵn y morthwyl,
yn atsain ddoe
...rhywle, mae e ‘ma.
Dwynwen Llywelyn yn darllen gwaith Enfys Hatcher 10
Englyn: Tir Comin
Y Glêr
Yr hen we fu’n gweundir ni. Barwniaid
A brynodd ei theithi
I ddileu’n holl ddolenni:
Cau allan ei hanian hi.
Hywel Griffiths yn darllen gwaith Osian Rhys 9
Tafarn y Vale
‘n gwaddol daw cyfrifoldeb a hawl
I’n hil drwy gyfundeb;
Eto, dyma ein hateb:
Ein tir ni yw – nid tir neb.
Gareth Ioan 8.5
