Who dey contest for APC govnorship primaries as Fubara, oda aspirants withdraw

Di All Progressives Congress (APC) govnorship primaries dey happun across different states of di federation today ahead of di 2027 general elections.

Dis dey come a day afta di party hold dia state assembly primaries on Wednesday, 20 May.

According to di 2027 election timetable wey di Independent National Electoral Commission (Inec) bin release, di window for parties to hold dia primary election na between 23 April and 30 May, 2026.

Dis one mean say all political parties must to do and conclude all activities to pick dia candidates across different level by di end of 30 May, 2026.

E include state House of Assembly, House of Representatives, Senate and presidential.

Rivers State

Govnor Siminalayi Fubara na one of di APC govnorship aspirants for Rivers State bifor e withdraw from di race.

For statement wey e sign by imsef, Fubara say e go support whoever go emerge as di candidate of di party.

E say leadership dey about sacrifice and "e get wen time go come wey personal ambition must submit to di greater good of di pipo".

Govnor Fubara say Rivers state big pass any individual and for dis critical moment, "di peace, stability and unity of our dear state must take precedence ova evri personal interest".

Govnor Fubara na di second pesin to step aside from di APC primaries afta Tonye Cole.

Alabo George Kelly na di aspirant wey di Minister of di Federal Capital Territory Nyesom Wike anoint to run for di party ticket.

George Kelly also withdraw from APC Rivers Governorship primaries afta Govnor Fubara withdrawal.

Dis mean say Ogundu Kingsley Chinda go run unopposed for di Rivers govorship primaries.

Alabo George Kelly say im withdrawal dey come afta one stakeholders meeting by di APC National leadership wia dem discuss party unity and strategy for Rivers State.

E add say consultation wit im political team and oda stakeholders also shape di decision.

George Kelly describe imsef as member of di Rivers State Rainbow Coalition for President Bola Tinubu wey dey work under di leadership of di FCT Minister Nyesom Wike.

Lagos State

Lagos State Deputy Govnor Obafemi Hamzat na di anointed aspirant for di Lagos State APC govnorship primaries.

Na aspirant wey get di backing of President Bola Tinubu and Govnor Babajide Sanwo-Olu.

Samuel Ajose wey bin also wan contest for di ticket withdraw from di race.

Ajose, wey pipo sabi as SMA Gold, say e step down to accept di wishes of APC leaders ahead of di party primaries.

"Di race don dey veri interesting and e dey come to emotional end yesterday for di phase of SMA for di 2027 election," e tok.

Oyo State

One of di aspirants wey wan contest for di APC govnorship ticket for Oyo State na di former minister of Power Bayo Adelabu.

Na about 11 aspirants dey hustle for di ticket and eight of dem come from Ibadan, di state capital, while two of dem come from Oke Ogun axis and one from Ogbomoso.

Di aspirants, wey don reportedly undergo screening by di party for Abuja, include Bayo Adelabu, Senator Sharafadeen Alli, Dr Adewale Kareem, Barrister Akeem Agbaje, Engineer Akeem Alao, Dr Ayobami Lam-Adesina, Prince Asanke Asatola and Ololade Usman.

Oda aspirants na Dr Muyiwa Gbadegesin, Senator Abdulfatai Buhari, and former Deputy Govnor Engineer Rauf Olaniyan.