'મોહમ્મદ દીપક' : 'કોઈ નહોતું ત્યારે દીપક પુત્ર બનીને આવ્યો', કશ્યપ અને વકીલ અહમદે એકસાથે મળીને શું કહ્યું?

એક જિમ ટ્રેનર અને એક વૃદ્ધ દુકાનદાર. બંને અલગ-અલગ પેઢીઓ અને અલગ પૃષ્ઠભૂમિના છે, છતાં એક ઘટનાએ બંનેની જિંદગી સામસામે લાવી દીધી.

ઉત્તરાખંડના પૌડી જિલ્લાના કોટદ્વારમાં 26 જાન્યુઆરીના રોજ કપડાની દુકાનના નામ પર વિવાદ થયા પછી આ બે વ્યક્તિ રાષ્ટ્રીય રીતે ધ્યાનપાત્ર અને ચર્ચાનો વિષય બની ગઈ છે.

આ ઘટના શેરીઓથી લઈને સોશિયલ મીડિયા અને રાષ્ટ્રીય મીડિયા, પોલીસ સ્ટેશનથી લઈને રાજકીય ચર્ચાઓ સુધી ગૂંજતી રહી છે, પરંતુ આ હંગામા વચ્ચે તેઓ એકસાથે જોવા મળ્યા નહોતા.

આ ઘટનાએ બંનેના જીવનને અલગ રીતે સ્પર્શ કર્યો છે.

બીબીસી ન્યૂઝ હિન્દી સાથેની વાતચીત દરમિયાન બંને એકસાથે આવ્યા: દીપક કશ્યપ, જેમણે 26 જાન્યુઆરીના હસ્તક્ષેપ દરમિયાન પોતાનું નામ 'મોહમ્મદ દીપક' રાખ્યું હતું અને વકીલ અહમદ, જેમની દુકાન 'બાબા કલેક્શન'થી વિવાદ થયો હતો.

કોટદ્વાર શહેરમાં એક મુસ્લિમ દુકાનદારના સમર્થનમાં બહાર આવેલા 'મોહમ્મદ દીપક' વિરુદ્ધ બજરંગદળના કાર્યકરોએ ગત શનિવારે 31 જાન્યુઆરીએ સાંજે અને એ પછી પણ વિરોધપ્રદર્શન કર્યું હતું.

દીપક કશ્યપે પોતાને 'મોહમ્મદ દીપક' ગણાવ્યા

દીપક કશ્યપ 26 જાન્યુઆરીના રોજ ચર્ચામાં આવ્યા હતા જ્યારે તેઓ કોટદ્વારના પટેલ રોડ પર એક વૃદ્ધ મુસ્લિમ દુકાનદારના સમર્થનમાં આગળ આવ્યા હતા.

આ વૃદ્ધ મુસ્લિમ દુકાનદારની દુકાનના નામ 'બાબા' (બાબા સ્કૂલ ડ્રૅસ ઍન્ડ મૅચિંગ સેન્ટર) અંગે બજરંગદળના લોકો વાંધો ઉઠાવી રહ્યા હતા અને તેમને દુકાનનું નામ બદલવા માટે કહી રહ્યા હતા.

26 જાન્યુઆરીએ બજરંગદળના લોકો આ દુકાને પહોંચ્યા હતા.

સોશિયલ મીડિયા પર 'મોહમ્મદ દીપક' તરીકે ઓળખાતો આ યુવાન ખરેખર દીપકકુમાર કશ્યપ છે. તેઓ ઉત્તરાખંડના કોટદ્વારના રહેવાસી છે અને વ્યવસાયે જિમ ટ્રેનર છે.

સોશિયલ મીડિયા પર વાઇરલ વીડિયોમાં તેઓ આ વૃદ્ધ મુસ્લિમ દુકાનદારના સમર્થનમાં બોલતા જોવા મળે છે અને તેમણે દુકાનનું નામ કેમ બદલવું જોઈએ તેવો સવાલ કરે છે. આ દરમિયાન બજરંગદળના કાર્યકર્તાઓ જ્યારે તેમને તેમનું નામ પૂછે છે ત્યારે દીપક તેમનું નામ મોહમ્મદ દીપક જણાવે છે.

કોટદ્વારના દીપક કશ્યપ વૃદ્ધ વકીલ અહેમદને વ્યક્તિગત રીતે ઓળખતા નહોતા. અહમદ એક નાની સ્કૂલ યુનિફોર્મની દુકાન ચલાવે છે.

તેમના વ્યવસાયો અને ધર્મો અલગ અલગ હોઈ શકે છે, પરંતુ તેઓ બંને જાણતા હતા કે મુશ્કેલીના સમયે કોઈની સાથે ઉભા રહેવું એ માનવ હોવાની પ્રથમ શરત છે.

આ બંને લોકો સાથે બીબીસીએ વાત કરી હતી. જુઓ વીડિયો.

રિપોર્ટ : આસિફ અલી

પ્રૉડ્યુસર : નવીન નેગી

ઍડિટ : આમરા આમિર

બીબીસી માટે કલેક્ટિવ ન્યૂઝરૂમનું પ્રકાશન