Tuesday, 12 April, 2005, 11:43 GMT 16:43 PST

کلون شدہ گائے کا گوشت محفوظ ہے

امریکہ اور جاپان میں ہونے والی ایک تحقیق کے مطابق کلوننگ کے ذریعے پیدا ہونے والی گائے اور بیل کا گوشت اور دودھ انسانوں کے لیے مضر صحت نہیں ہے۔

اس تحقیق میں شامل افراد کا کہنا ہے کہ تحقیق کے نتائج سے یہ بات سامنے آئی ہے کہ کلوننگ کے طریقہ کار سے غذا کی پیداوار کو بڑھایا جا سکتا ہے اور اس طرح خاص طور پر ترقی پذیر ممالک کو فائدہ ہو سکتا ہے۔

یہ تحقیق نیشنل اکاڈمی آف سائنسز میں ہوئی ہے۔

تحقیق کاروں نے جن کی قیادت کنیکٹیکٹ یونیورسٹی کے جیری یانگ کر رہے تھے عام جانوروں کے گوشت اور دودھ کا موازنہ کلونگ کے ذریعے پیدا ہونے والے جانوروں سے حاصل شدہ گوشت اور دودھ سے کیا۔

تحقیق کاروں کے مطابق کلوننگ والے جانوروں کے گوشت میں چکنائی کی سطح عام جانوروں سے زیادہ تھی۔ تاہم تحقیق کاروں کا کہنا ہے کہ یہ سطح طے شدہ معیار سے زیادہ نہیں ہے۔