Benfica ya Mourinho igiye gusoza shampiyona idatsinzwe – ariko itanatwaye igikombe

Mu gihe hasigaye imikino ibiri gusa shampiyona y'ikiciro cya mbere muri Portugal ikarangira, ikipe ya Benfica itozwa na Jose Mourinho ishobora kwinjira mu makipe asoza adatsinzwe na rimwe muri 'sizoni' yose.

Gusa ariko nanone kugera kuri ibyo ntabwo bihagije ngo bihe iyi kipe igikombe cya 39 yifuza cya shampiyona.

Porto yamaze kucyegukana mu mpera z'icyumweru gishize nyuma yo kujya imbere ya Benfica amanota icyenda.

Porto itozwa na Andre Villas-Boas, wigeze gutoza Chelsea na Tottenham, yatsinzwe umukino umwe mu mikino 32 imaze gukina.

Naho Benfica ntiratsindwa na rimwe, gusa yanganyije inshuro 10 – esheshatu kurusha Porto.

Benfica izasoza idatsinzwe na rimwe niramuka yitwaye neza imbere ya Braga ku cyumweru na Estoril Praia ku munsi wa nyuma y'iyo shampiyona.

Ibi kandi ntabwo bizaba ari ubwa mbere Benfica ishoze shampiyona idatsinzwe ariko itanatwaye igikombe.

Muri 'sizoni' ya 1977-78 Porto nabwo yatwaye igikombe yo yaranganyije imikino ibiri munsi ya Benfica maze itwara igikombe iyirushije ikinyuranyo cy'ibitego.

Benfica ishobora gusanga FC Sheriff yo muri Moldova (2024-25) na Red Star Belgrade (2007-08) yo muri Serbia nk'amakipe yonyine y'i Burayi muri iki kinyejana yabuze igikombe kandi arangishe shampiyona adatsinzwe.

Ese Benfica 'yagabiye' Porto igikombe?

Mourinho na Benfica nibareba nabi bashobora no kurangiza ku mwanya wa gatatu kuko ubu barusha amanota atatu gusa Sporting ifite umukino w'ikirarane n'ibitego byinshi izigamye kubarusha.

Ikinyamakuru cy'imikino A Bola cyo muri Portugal kivuga ko Benfica "yagabiye" Porto amanota 12, ubwo yananirwaga gutsinda imikino 10 yakomeje kuzamo imbere mbere y'uko irangira iyinganyije.

Gusa, bamaze kubona ko icyizere cyo gutwara igikombe cyiyoyotse nyuma yo kunganya 2 -2 na Famalicao ku wa gatandatu, perezida wa Benfica Rui Costa yahise yibasira abasifuye umukino.

Yagize ati: "Nta ukwiye kuba afite uburenganzira bwo kugena utwara igikombe cyangwa ujyanye muri 'Champions League' atari abakinnyi n'abatoza mu kibuga, kandi ibyabaye hano uyu munsi si ibyo".

Costa yinubiye ko Famalicao yahawe penaliti idakwiye, mu gihe igitego cyabo cya kabiri "cyavuye kuri 'corner' itari yo".

Ati: "Bisobanura neza ibyo umusifuzi yaje gukora hano uyu munsi. Kugerageza ngo Benfica itsindwe".

Ikinyamakuru Record cyaho kivuga ko ishyirahamwe ry'abasifuzi muri Portugal rizatanga ikirego kuri Costa nyuma ya biriya yavuze.

Jose Mourinho nawe utarishimiye ibyabaye ku mukino wo kuwa gatandatu, yagize ati: "Uyu mukino ni ishusho nziza y'ibyabaye muri iyi shampiyona."

Mourinho ubu bivugwa ko ashakwa n'amakipe arimo Real Madrid mu gihe iyo kipe yo muri Espagne yaba itandukanye na Alvaro Arbeloa.

Gusa ikinyamakuru O Jogo kivuga ko Benfica ishaka guha amasezerano mashya Mourinho muri iki cyumweru.