ቀጥታ, ፕሬዝዳንት ትራምፕ በኢራን ላይ ጦርነት የማካሄድ ሥልጣናቸው በምክር ቤት በመገደቡ ቁጣቸውን ገለጹ

የቀጥታ ሽፋን

1. ከ 3 ሰአት በፊትፕሬዝዳንት ትራምፕ በኢራን ላይ ጦርነት የማካሄድ ሥልጣናቸው በምክር ቤት በመገደቡ ቁጣቸውን ገለጹ

   

   የፎቶው ባለመብት, EPA

   የአሜሪካ ተወካዮች ምክር ቤት አባላት በኢራን ላይ ጦርነት የማካሄድ ሥልጣናቸውን የሚገድብ ውሳኔ በማሳለፉቸው ፕሬዝዳንት ዶናልድ ትራምፕ የምክር ቤቱን አባላት አጥብቀው ተቹ።

   ፕሬዝዳንቱ ከኢራን ጋር የሚደረገውን ጦርነት ለማብቃት የሚያስችለው ድርድር “ከመጨረሻ ደረጃ” ላይ በደረሰበት ጊዜ የአሜሪካ ሕዝብ ተወካዮች ምክር ቤት ጦርነት በማካሄድ ሥልጣናቸው ላይ ገደብ መጣሉን “አገር ወዳድነት አይደለም” ሲሉ ተናግረዋል።

   ፕሬዝዳንት ትራምፕ በትሩዝ የማኅበራዊ ሚዲያ ገጻቸው ላይ ውሳኔውን በተመለከተ ባሰፈሩት ጽሁፍ ተቀናቃኞቸቻውን ዲሞክራቶች እና እነሱን ደግፈው ድምጽ የሰጡ የፓርቲያቸው ሪፐብሊካን የምክር ቤት አባላትን ወቅሰዋል።

   ". . .ከኢራን እስላማዊ ሪፐብሊክ ጋር የሚደረገውን ጦርነት ለማብቃት በመጨረሻው ድርድር መካከል ላይ እያለሁ አራት የሪፐብሊካን እና ሁሉም የዲሞክራቲክ ፓርቲ አባላት የምክር ቤት እንደራሴዎች ጦርነት የማካሄድ ሥልጣኔን የሚገድብ ትርጉም የለሽ ውሳኔ አሳልፈዋል” ብለዋል።

   "ድርድሩ ከምን ደረጃ ላይ እንዳለ እያወቁ እንዴት እንዲህ ያለ ከአርበኝነት የራቀ ውሳኔ ይሰጣሉ?” ሲሉ በተወካዮች ምክር ቤት አባላቱ ውሳኔ ደስተኛ አለመሆናቸውን ገልጸዋል።

   ከዚህ ቀደም ብዙም ባልታየ ሁኔታ የአሜሪካ ምር ቤት ረቡዕ ዕለት የዲሞክራቲክ ፓርቲ አባላት ያቀረቡትን ፕሬዝዳንት ትራምፕ በኢራን ላይ የሚያካሂዱትን ጦርነት የሚገድብ የውሳኔ ሀሳብ በመደገፍ ድምጽ ሰጥተዋል።

   ይህ ውሳኔ በምክር ቤቱ ውስጥ ካሉ ዲሞክራቶች የ211 አባላት ድጋፍ ያገኘ ሲሆን፣ አራት የትራምፕ ፓርቲ አባላትም ደፈግወውት በ215 ለ208 በሆነ የድምጽ ብልጫ ነው ተቀባይነት ያገኘው።

   የኢራን ጦርነት ከተጀመረ በኋላ የትራምፕን ጦርነት የማካሄድ ሥልጣን ለመገደብ በተደጋጋሚ ድምጽ ቢሰጥም ተቀባይነት ሳያገን ቀርቶ ነበር። አሁን ግን አብዛኞቹ ሪፐብሊካኖች ውሳኔውን ቢቃወሙትም በአብላጭ ድምጽ አልፏል።

2. ከ 5 ሰአት በፊትየአሜሪካ ቪዛ የዘገየበት በዓለም ዋንጫ የሚሳተፈው የኢራን ቡድን ወደ ሜክሲኮ ሊጓዝ ነው

   

   የፎቶው ባለመብት, IRNA

   ከአሜሪካ ጋር ጦርነት ውስጥ የቆየችው የኢራን ብሔራዊ ቡድን አሜሪካ ከሜክሲኮ እና ከካናዳ ጋር በጥምረት በምታስተናግደው የዓለም ዋንጫ ለመሳተፍ የአሜሪካ ቪዛ ቢዘገይበትም ወደ ሜክሲኮ እንደሚጓዝ ተገለጸ።

   ኢራን ዜና አገልግሎት ኢርና ብሔራዊ ቡድኑን ጠቅሶ እንደዘገበው ሁሉም ተጫዋቾች እና የቡድኑ አባላት የሜክሲኮ ቪዛ ስላገኙ ቅዳሜ ዕለት ከቱርክ ተነስተው ወደዚያው ይጓዛሉ።

   በምድብ ጂ ከቤልጂየም፣ ከግብፅ እና ከኒው ዚላንድ ጋር የተደለደለው የኢራን ብሔራዊ ቡድን ከሜክሲኮ በተጨማሪ አሜሪካ ውስጥ ስለሚጫወት የአሜሪካ ቪዛ ያስፈልገዋል።

   ኢራን ከኒው ዚላንድ እና ከቤልጂየም ጋር የምታደርጋቸው የመጀመሪያ ሁለት ጨዋታዎች ሎስ አንጀለስ ውስጥ የምታካሂድ ሲሆን ከግብፅ ጋር ደግሞ ሲያትል ውስጥ ትጋጠማለች።

   ምንም እንኳን የብሔራዊ ቡድኑ ቀዳሚ ጨዋታዎች በአሜሪካ ከተሞች ውስጥ የሚካሄዱ ቢሆንም የቡድኑ አባላት አስካሁን የአሜሪካ ቪዛ አላገኙም።

3. ከ 8 ሰአት በፊትየኢራኑ ጠቅላይ መሪ ‘ጠላት በጦር ሜዳ ተሸንፏል’ ካሉ በኋላ መከፋፈል እንዳይኖር አሳሰቡ

   

   የፎቶው ባለመብት, Reuters

   የኢራኑ ጠቅላይ መሪ ኖጅታባ ኻሜኒ ሐሙስ ዕለት ባስተላለፉት መልዕክት ‘ጠላቶቻችን በጦር ሜዳ ተሸንፈዋል’ ካሉ በኋላ አሁን ደግሞ የሕዝቡን ጥንካሬ ለማፍረክረክ እና መከፋፈል ለመፍጠር እየሞከሩ ነው አሉ።

   ኻሜኒ ኢራናውያን አገሪቱ በተጋፈጠችው ስጋት ፊት ብሔራዊ አንድነት እንዲያሳዩ ጥሪ አስተላልፈው በሕዝብ መካከል ተስፋ መቁረጥን ወይም መከፋፈልን መፍጠር ጠላትን መርዳት ነው ብለዋል።

   የጠቅላይ መሪው መልዕክት የተነበበው የእስላማዊ ሪፐብሊክ መስራች የሆኑትን ሩሆላህ ኻሜኒን የሚዘክረው ዓመታዊ ክብረ በዓል ላይ ነው።

   ሞጅታባ ኻሜኒ ሥልጣን ከተረከቡበት ጊዜ ጀምሮ በአደባባይ ታይተው አያውቁም።

   ከዚህ በፊት የሰጧቸው የተለያዩ መግለጫዎች በጽሑፍ የቀረቡ ሲሆን ስላሉበት ሁኔታ ወይንም በአገሪቱ አስተዳደር ውስጥ ስላላቸው የዕለት ተዕለት ቁጥጥር በተመለከተ ቀጥተኛ ማስረጃ የለም።

4. 4 ሰኔ 2026ቻይና ታይዋንን የጎበኙ አራት የኒው ዚላንድ የሕዝብ እንደራሴዎች ላይ እገዳ ጣለች

   

   የፎቶው ባለመብት, Lin Chia-lung/Facebook

   ቻይና አራት የኒው ዚላንድ ሕዝብ ተወካዮች ምክር ቤት አባላት ታይዋንን በመጎብኘታቸው ለአንድ ዓመት እገዳ እንደጣለችባቸው የኒውዚላንድ ውጭ ጉዳይ ሚኒስቴር አስታወቀ።

   የሕዝብ እንደራሴዎቹ እገዳው እንደተጣለባቸው ያወቁት የቻይና ኤምባሲ በግንቦት ወር ከጉብኝታቸው ሲመለሱ ይቅርታ ከጠየቁ ሊቀነስ ወይንም ሊነሳላቸው እንደሚችል ከገለጸላቸው በኋላ መሆኑን የአገር ውስጥ መገናኛ ብዙኃን ዘግበዋል።

   ቻይና ታይዋን ደሴትን የግዛቷ አካል አድርጋ የምትቆጥር ሲሆን ከየትኛውም አገር ጋር የውጭ ግንኙነት እንድታደርግ አትፈቅድም።

   ቻይና በኒው ዚላንድ የሕዝብ ተወካዮች ምክር ቤት አባላት ላይ እገዳ ስትጥል ይህ የመጀመርያዋ ነው።

   የኒው ዚላንድ የውጭ ጉዳይ ሚኒስቴር ቃል አቀባይ ዊንስተን ፒተርስ በቻይና ውሳኔ “መደነቃቸውን” ለቢቢሲ ተናግረዋል።

   ቃል አቀባዩ “የኒው ዚላንድ የፓርላማ አባላት ታይዋንን ለብዙ አሥርተ ዓመታት ጎብኝተዋል፤ እናም እንደዚህ ያሉ ጉብኝቶች ከኒው ዚላንድ አንድ ቻይና ፖሊሲ ጋር የሚቃረኑ አይደሉም” ብለዋል።

   በኒው ዚላንድ የሚገኘው የቻይና ኤምባሲ ሐሙስ ዕለት በሰጠው መግለጫ እገዳው የፓርላማ አባላቱ “የቻይናን አሳሳቢ ጉዳዮች ችላ በማለታቸው” እና እንደ ፓርላማ አባልነታቸው ታይዋንን ለመጎብኘት ፍላጎት በማሳየታቸው የተወሰደ እርምጃ ነው ብሏል።

   ጉብኝቱ ለታይዋን ገዥው ዴሞክራቲክ ፕሮግረሲቭ ፓርቲ እና የታይዋን የነጻነት ኃይሎች “የተሳሳቱ ምልክቶችን ልኳል” ሲል ኮንኖ “በቻይና የውስጥ ጉዳይ ላይ ጣልቃ መግባት” ነው ብሏል።

5. 4 ሰኔ 2026እስራኤል በደቡባዊ ሊባኖስ ዘመቻዋን እንደምትቀጥል የመከላከያ ሚኒስትሩ ተናገሩ

   

   የፎቶው ባለመብት, Reuters

   የእስራኤል መከላከያ ሚኒስትር እዝራኤል ካትዝ ጦራቸው በደቡባዊ ሊባኖስ የሚያካሄደውን ዘመቻ ለጊዜው እንደሚቀጥል አስታወቁ።

   ሚኒስትሩ አክለውም ከቤታቸው የተፈናቀሉ ሊባኖሳውያን መመለስ አይችሉም ሲሉ ተናግረዋል።

   የሚኒስቴሩ አስተያየት የተሰማው ሊባኖስ እና እስራኤል በዋሺንግተን የተኩስ አቁሙን ተግባራዊ ለማድረግ መስማማታቸው ከተገለጸ በኋላ ነው።

   ስምምነቱ ሄዝቦላህ ወደ እስራኤል ሮኬቶችን ማስወንጨፍ እና ጥቃት መፈጸም ከማቆሙ ጋር የተገናኘ ነው።

   ካትዝ በመግለጫቸው ላይ ወታደሮቻቸው በደቡባዊ ሊባኖስ የደህንነት ቀጣና በሚባሉት እና 900 ዓመት እድሜ አለው በተባለው እና እስራኤል ቅዳሜ ዕለት በተቆጣጠረችው ቤውፎርት አምባ እንደሚቆዩ ተናግረዋል።

   ሚኒስትሩ ”እስራኤል “በአካባቢው የሚገኘውን የሽብርተኛ መሠረተ ልማት ማፈራረስ” እንደምትቀትል ተናግረው “በእስራኤል ማኅበረሰቦች እና ግዛት ውስጥ ጥቃት ከተፈጸመ ምላሽ የመስጠት መብት እንዳለን አሜሪካም ትደግፈዋለች” ብለዋል።

   ሊባኖስ እና እስራኤል ረቡዕ ዕለት በአሜሪካ አደራዳሪነት የተኩስ አቁሙን ተግባራዊ ለማድረግ ተስማምተዋል።

   ሁለቱ አገራት በሚያዚያ ወር ግጭት የማቆም ስምምነት ላይ ከደረሱ በኋላ በግንቦት ወር የተራዘመ ቢሆንም ግጭቶች ግን ቀጥለዋል።

6. 4 ሰኔ 2026እስራኤል እና ሊባኖስ ሄዝቦላህ ጥቃቱን የሚያቆም ከሆነ የተኩስ አቁሙን ተግባራዊ ለማድረግ ተስማሙ

   

   የፎቶው ባለመብት, Reuters

   የአሜሪካ ውጭ ጉዳይ ሚኒስቴር እስራኤል እና ሊባኖስ የተኩስ አቁሙ ተግባራዊነት ላይ መስማማታቸውን አስታወቀ።

   ሚኒስቴር መሥሪያ ቤቱ ባወጣው መግለጫ፣ ስምምነቱ በኢራን ከሚደገፈው ታጣቂ ቡድን ሄዝቦላህ የሚሰነዘረውን ጥቃት እና ሌሎች ቅድመ ሁኔታዎችን "በፍፁም ማቆም ላይ የተመሠረተ" ነው ብሏል።

   ረቡዕ ዕለት እስራኤል በደቡባዊ ሊባኖስ በፈጸመችው ጥቃት ቢያንስ ዘጠኝ ሰዎች የተገደሉ ሲሆን ሄዝቦላህም ወደ ሰሜናዊ እስራኤል ሮኬቶችን ተኩሷል።

   ሚኒስቴር መሥሪያ ቤቱ በመገለጫው አክሎም “ሁሉም አገራት በእስራኤል እና በሊባኖስ መካከል ያለው የወደፊት ግንኙነት በሁለት ሉዓላዊ መንግሥታት መካከል መወሰን እንዳለበት ተስማምተዋል። በመንግሥታዊ ወይንም መንግሥታዊ ባልሆኑ ማንኛውም አካላት ሊባኖስን እንደማስያዣ ለመጠቀም የሚደረግን ጥረት ውድቅ አድርገዋል” ብሏል።

   ስምምነቱ እስራኤል በምትቆጣጣረው ደቡባዊ ሊባኖስ ከሊታኒ ወንዝ እስከ ድንበሩ ካለው አካባቢ “ሁሉም የሄዝበላህ ተዋጊዎች እንዲወጡ” ቅድመ ሁኔታ ያስቀምጣል።

   አሜሪካ “የሊባኖስ መከላከያ የሚቆጣጠረው እና ማንኛውም ከመንግሥት ውጪ የሆነን ታጣቂ የሚያስወገድበትን የሙከራ ዞኖች” እንዲመሠረት ድጋፍ እንደምታደርግም መግለጫው ጠቅሷል።

   በሁለቱ አገራት መካከል ይህ ስምምነት የተደረሰው ሰኞ ዕለት ሄዝቦላህ እስራኤልን የማያጠቃ ከሆነ በምላሹ ቴል አቪቭ ቤይሩትን እንደማትደበድብ ዋስትና መስጠቷን እና ከፊል ተኩስ አቁም መታወጁን ሊባኖስ ካሳወቀች በኋላ ነው።

   ሁለቱ አገራት ዳግም ሰኔ 15፣2018 ዓ.ም. ተገናኝተው “አጠቃላይ ሰምምነት ላይ ለመድረስ የሚያስችላቸው ጉዳዮች ላይ ለመወያየት” ቀጠሮ ይዘዋል።

   ሄዝቦላህ ስለ ስምምነቱ እስካሁን ድረስ በይፋ ያለው ነገር የለም።

7. 3 ሰኔ 2026ከፕሬዝዳንት ትራምፕ ጋር የተወዛገቡት ጠ/ሚኒስትር ኔታኒያሁ ኢራን “በእሳት እየተጫወተች ነው” አሉ

   

   የፎቶው ባለመብት, Reuters

   የእስራኤሉ ጠቅላይ ሚኒስትር ቤንያሚን ኔታንያሁ በእሳት እየተጫወተች ነው ያሏት ኢራን ያላትን የዩራኒየም ክምችት ለማስወገድ እንዳልተስማማች ነገር ግን የሚደርስባት ጫና እየበረታ መሆኑን ተናገሩ።

   ከአሜሪካው ፕሬዝዳንት ጋር መወዛገባቸው የተነገረው ጠቅላይ ሚኒስትሩ ከትራምፕ ጋር በኢራን ጉዳይ ተመሳሳይ አቋም እንዳቸላው ተናግረዋል።

   ጠቅላይ ሚኒስትሩ ለሲኤንቢሲ በሰጡት ቃለ ምለልስ ኢራን ከአሜሪካ ጋር የምታደርገው ድርድር ካለስኬት ቢቋጭ ብዙም እንደማያሳስባቸው እና የኢራን ጉዳይ ያላበቃ ቢሆንም ግን በከፍተኛ ሁኔታ መዳከሟን ገልጸዋል።

   ከኢራን ጋር ዳግም ወደ ሙሉ ጦርነት የመግባቱ ጉዳይ በፕሬዝዳንት ትራምፕ የሚወሰን መሆኑን እና ”የአሜሪካ እና የእስራኤል ኃይሎች ዝግጁ ናቸው። ኢራንም ይህንን ማወቅ አለባት፤ እነሱም ያውቃሉ ብዬ አስባለሁ። ነገር ግን በግልጽ እንደሚታየው በእሳት እየተጫወቱ ነው” ብለዋል።

   ጠቅላይ ሚኒስትር ኔታኒያሁ እና ፕሬዝዳንት ትራምፕ እስራኤል በሊባኖስ ውስጥ እያካሄደችው ካለው ጦርነት ጋር በተያያዘ ባለፉት ቀናት ሲዘገብ እንደነበረው በሁለቱ መሪዎች መካከል ጠንከር ለያ ንግግር መደረጉ ተገልጿል።

   ፕሬዝዳን ትራምፕ “ፖድ ዋን ፎርስ” ከተባለ ፖድካስት ጋር ባደረጉት ቃለ ምልልስ ከኔታኒያሁ ጋር የጋለ ምልልስ ማድረቸጋውን አረጋግጠዋል።

   “አዎ [ጠንካራ ውይይት] አድርገናል። በጣም ተናድጄ ነበር፤ ሊባኖስ ውስጥ [ኔታኒያሁ] እያካሄደው ባለው ያልተቋረጠ ጦርነት ተረብሼ ነበር” በማለት ውይይታቸው ጠንከር ያለበትን ምክንያት አስረድተዋል።

   የኔታኒያሁ ጽህፈት ቤት ከፕሬዝዳንት ትራምፕ ጋር ስለተደረገው የስልክ ምልልስ በይፋ ከመናገር ቢቆጠብም ጠቅላይ ሚኒስረሩ ግን “እንደ ጥሩ ቤተሰብ አንዳንድ ጊዜ ስልታዊ ልዩነቶች አሉን” በማለት ጉዳዩን በማጣጣል የጋራ ዘላቂ አላማ እንዳላቸው አመልክተዋል።

   ኔታኒያሁ ጨምረውም ከኢራን ጋር በተያያዙ ጉዳዮች ላይ ከፕሬዝዳንት ትራምፕ ጋር ዘወትር ስመምነት እንዳላቸው ተናግረዋል።

8. 3 ሰኔ 2026ኢራን በኩዌት አውሮፕላን ማረፊያ ላይ የድሮን ጥቃት ፈጽማ አንድ ሰው መገደሉ ተነገረ

   

   የፎቶው ባለመብት, Reuters

   በኩዌት ዓለም አቀፍ አውሮፕላን ማረፊያ ላይ በተፈጸመ የኢራን የድሮን ጥቃት አንድ ሰው መገደሉን እና 60 ሰዎች መቁሰላቸውን አንድ የአገሪቱ ባለሥልጣን ተናገሩ።

   የኩዌት የመከላከያ ሚኒስቴር ቃል አቀባይ ጥቃቱን “የኢራን የወንጀል ድርጊት” ሲሉ የአገሪቱ የውጭ ጉዳይ ሚኒስቴር ደግሞ በጥቃቱ የዲፕሎማቲክ ተቋማት ላይ ጉዳት ደርሷል ብሏል።

   የኢራን እስላማዊ አብዮታዊ ዘብ ጥቃቱ አሜሪካ ዛሬ ጠዋት በኢራን የነዳጅ ጫኝ መርከብ እና በቄሽም ደሴት ላይ ለፈጸመችው ጥቃት አጸፋ መሆኑን ገልጿል። ኢራን ቀደም ብላ በባሕረ ሰላጤው የሚገኙ የአሜሪካ ወደታራዊ ሰፈሮችን ዒላማ ማድረጓን አሳውቃ ነበር።

   አሜሪካ ጠዋት ላይ “ራስን የመከላከል” እርምጃ በኢራን ላይ መውሰዷን እና ወደ ኩዌት እና ባህሬን የተወነጨፉ የኢራን ሚሳኤሎችን መትታ ማክሸፏን ገልለጻች።

   በኩዌት አየር ማረፊያ ላይ በተፈጸመው የኢራን የድሮን ጥቃት የተገደለው ግለሰብ ሕንዳዊ ዜግንት ያለው መሆኑ ታውቋል።

   የሕንድ የውጭ ጉዳይ ሚኒስቴር ባወጣው መግለጫ ጥቃቱን በማውገዝ በተጨማሪም ሌሎች በርካታ ዜጎቹ በጥቃቱ ጉዳት እንደደረሰባቸው ገልጿል።

   ዛሬ በኢራን እና በአሜሪካ መካከል የተካሄደው የአጸፋ ጥቃት መቋጫ ያላገኘው የሁለቱን አገራት ድርድር እንዲቋረጥ ሊያደርገው ይችላል የሚል ስጋት ፈጥሯል።

9. 3 ሰኔ 2026ሩሲያ በምትቆጣጠረው የዩክሬን ግዛት በአውቶብስ ላይ በተፈጸመ የድሮን ጥቃት ሰባት ሰዎች ተገደሉ

   

   የፎቶው ባለመብት, Getty Images

   ሩሲያ በምትቆጣጠረው የዩክሬን ግዛት አውቶብስ ላይ በተፈጸመ ጥቃት ሰባት ሰዎች መገደላቸውን እና አስራ አንድ መቁሰላቸውን ባለሥልጣናት አስታወቁ።

   ክሬምሊን በዩክሬን ምሥራቃዊ ዶኔትስክ ክልል የሾመቻቸው ዴኒስ ፑሺሊን ጥቃቱ ከሞስኮ ወደ ክሬሚያ ሲምፎሮፖል ይጓዝ በነበረ አውቶቡስ ላይ ረቡዕ ማለዳ መድረሱን ገልጸዋል።

   በተያያዘ ዜና ረቡዕ ማለዳ በሴይንት ፒተርስበርግ ጭስ የታየ ሲሆን፣ የዩክሬን ፕሬዝዳንት ቮሎድሚር ዜሌንስኪ የከተማዋ የነዳጅ ማከማቻ ላይ ጥቃት መፈጸማቸውን አረጋግጠዋል።

   ጥቃቱ የተፈጸመው ሩሲያ ዓለም አቀፉን የኢኮኖሚክ ፎረም በምታዘጋጅት ወቅት ነው።

   ሩሲያ ትናንት ማክሰኞ በዩክሬን ከተሞች ላይ በርካታ የድሮን ጥቃቶች ፈጽማ ሕጻናት እና ሴቶችን ጨምሮ ቢያንስ 22 ሰዎች ተገድለዋል።

   ፑሽሊን በድሮን ጥቃት በደረሰበት አውቶብስ ሰባት ሰዎች መግደላቸውን ገልጸው ጉዳት የደረሰባቸው 11 ሰዎች የሕክምና ክትትል እየተደረገላቸው ነው ብለዋል።

   ዩክሬን በአውቶቡስ ላይ ስለተፈጸመው የድሮን ጥቃት እስካሁን ያለችው ነገር የለም።

   ሩሲያ ሌሊቱን ከዩክሬን የተነሱ 350 ድሮኖችን መትታ መጣሏን አስታውቃለች።

10. 3 ሰኔ 2026ኢራን በኩዌት አውሮፕላን ማረፊያ ላይ በፈጸመችው የድሮን ጥቃት በርካቶች መጎዳታቸው ተገለጸ

    

    የፎቶው ባለመብት, Getty Images

    የኢራን ድሮኖች የኩዌት አውሮፕላን ማረፊያ ላይ ረቡዕ ማለዳ ጥቃት መፈጸማቸውን ተከትሎ በረራዎች መቋረጣቸው ተገለጸ።

    በኩዌት የአውሮፕላን ማረፊያ ላይ ጥቃት የተፈጸመው ቴህራን እና ዋሺንግተን አንዳቸው በሌላኛቸው ላይ ጥቃት ከፈጸሙ በኋላ ሲሆን በርካታ ሰዎች መጎዳታቸውም ተገልጿል።

    ሁለት የኢራን ዜና ወኪሎች ቴህራን የተኩስ አቁሙን ለማራዘም ከአሜሪካ ጋር የምታደርገውን ንግግር ማቋረጧን ማክሰኞ ዕለት ዘግበዋል።

    ትራምፕ ግን ዘገባውን አጣጥለው ንግግሮች እየተካሄዱ ናቸው ብለዋል።

    የኩዌት መከላከያ ቃል አቀባይ ብርጋዴር ጄነራል ሳዑድ አብዱላዚዝ አል ኦታእቢ “በርካታ ጥቃት ፈጻሚ ድሮኖች” የኩዌት ዓለም አቀፍ አውሮፕላን ማረፊያ የመንገደኞች ማስተናገጃን ዒላማ ማድረጋቸውን ጠቅሰዋል።

    በጥቃቱ የመንገደኞች ማስተናገጃው ክፉኛ መጎዳቱን የገለጹ ሲሆን “በርካታ ሰዎችን” አቁስሏል ብለዋል።

    የአውሮፕላን ማረፊያው በኢራን ጦርነት ምክንያት ተዘግቶ ከቆየ በኋላ ለአገልግሎት ክፍት የሆነው ከሁለት ቀናት በፊት ግንቦት 24/2018 ዓ.ም. ነበር።

    ባለፈው ሳምንት ማክሰኞ የአሜሪካ ጦር ኢራን በኩዌት እና ባህሬን ላይ ጥቃት መፈጸሟን ጠቅሶ በወታደራዊ ተቋማቷ ላይ የአጸፋ ምላሽ ድብደባ ማካሄዱን አስታውቋል።

    የአሜሪካ ጦር አክሎም በኩዌት የሚገኙ የጦር ሰፈሮቹን ዒላማ ያደረጉ “በርካታ ድሮኖችን መትተን ጥለናል” ሲል አስታውቋል።

    የኢራን ፈጥኖ ደራሽ አብዮታዊ ዘብ በባህሬን የሚገኝ የአሜሪካ ባሕር ኃይል ዋና ማዘዣ እና ኩዌትን በስም ሳይጠቅስ ሌላ አገር ላይ ጥቃት መፈጸሙን ገልጿል።

    አክሎም ጥቃቱን የፈጸመው የአሜሪካ ጦር የጣለውን እገዳ ለማለፍ እየተንቀሳቀሰች የነበረች ነዳጅ ጫን መርከብ ሞተር ላይ ጥቃት መፈጸሙን ተከትሎመሆኑን ጠቅሷል።

    አብዮታዊ ዘቡ በመግለጫው “ከዚህ በፊት ለማንኛውም ጥቃት የምንሰጠው ምላሽ የተለየ እና የከፋ እንደሚሆን ተናግረን በነበረው መሠረተ እረምጃውን ወስደናል” ብሏል።

    

    የፎቶው ባለመብት, reuters

11. 3 ሰኔ 2026አሜሪካ የኢራን ግዙፍ የክሪፕቶ መገበያያ ከአብዮታዊ ዘቡ ጋር ግንኙነት አለው በሚል ማዕቀብ ጣለች

    

    የፎቶው ባለመብት, Reuters

    አሜሪካ ማክሰኞ ዕለት የኢራን ግዙፍ የክሪፕቶከረንሲ መገበያያ የቴህራን መንግሥት እና ስማቸው በጥቁር መዝገብ ላይ የሰፈሩ ኩባንያዎች የምዕራባውያንን ማዕቀብ ለማለፍ ያገለግላል በሚል ማዕቀብ ጣለች።

    ሮይተርስ የዜና ወኪል በግንቦት ወር ኖቢቴክስ (Nobitex) የሚባለው የክሪፕቶከረንሲ መገበያያ ከአገሪቱ ሕጋዊ የገንዘብ ሥርዓት ጋር በትይዩነት ለማዕከላዊ ባንኩ እና ለአብዮታዊ ዘቡ እያገለገለ መሆኑን በመጥቀስ ዘግቦ ነበር።

    ዘገባው አክሎም ኖቢቴክስ ኢንተርኔት በተዘጋበት ወቅትም አገልግሎት ሲሰጥ መቆየቱን አመልክቶ በሚሊዮን ዶላሮች የሚቆጠሩ ግብይቶችን ማካሄዱን አሳይቷል።

    የአሜሪካ ግምጃ ቤት ኃላፊ ስኮት ቤሴንት ማክሰኞ ዕለት ባወጡት መግለጫ “የኢራን ኢኮኖሚ እየተንኮታኮተ ባለበት ወቅት አገዛዙ ለራሱ እኩይ አጀንዳው የዲጂታል መገበያያዎችን ማዕቀብ ለማምለጥ እና ሃብት ከአገር ውጭ ለማሻገር መጠቀም መርጧል” ብለዋል።

    የሮይተርስ ዘገባ እንደሚያሳየው ኖቢቴክስ ከኢራናውያን ቤተሰቦች በተገኙ ወንድማማቾች የተመሠረተ ሲሆን፣ ከአዲሱ ጠቅላይ መሪ ጋር ጥብቅ ቁርኝት አላቸው።

    የአሜሪካ ግምጃ ቤት ሁለቱ ወንድማማቾች ላይ ማዕቀብ መጣሉን ማክሰኞ ዕለት አስታውቋል።

    ኖቢቴክስ ለኢራን መንግሥት “ጠንካራ ድጋፍ” እየሰጠ ነው፤ እንዲሁም ለአብዮታዊ ዘቡ እና ለአገሪቱ ማዕከላዊ ባንክ “በርካታ ቁጥር ያለው” የዲጂታል ግብይቶችን አመቻችቷል ብሏል።

    "በኢራን ውስጥ አሜሪካ ጦርነት መክፈቷን ተከትሎ ኖቢቴክስ የኢንተርኔት አገልግሎት ቢቋረጥም የአገዛዙን ሀብት ለመከላከል በኢራን ውስጥ ንብረቶችን እና ገንዘቦችን ለማንቀሳቀስ ሚና ተጫውቷል።"

12. 3 ሰኔ 2026እስራኤል ከሄዝቦላህ ጋር ከፊል ተኩስ አቁም ከተስማማች በኋላ በደቡባዊ ሊባኖስ ጥቃቶችን ፈጸመች

    

    የፎቶው ባለመብት, Reuters

    ኢራን ማክሰኞ ዕለት በደቡባዊ ሊባኖስ የምትፈጽመውን ጥቃት የቀጠለች ቢሆንም በኢራን ከሚደገፈው ሄዝቦላህ ጋር የደረሰችውን ከፊል ተኩስ አቁም ተከትሎ በዋና ከተማዋ ቤይሩት ላይ ጥቃት አለመፈጸሟን ተገለጸ።

    ሊባኖስ የአሜሪካው ፕሬዝዳንት ሰኞ አመሻሽ ላይ ይፋ ያደረጉትን ስምምነት ተከትሎ ሄዝቦላህ እስራኤል ላይ ጥቃት የማይፈጽም ከሆነ ጦሯ ቤይሩትን እንደማያጠቃ በማሳወቃቸው ድብዳው አልተፈጸመም ብላለች።

    ኢራን በበኩሏ እስራኤል በሊባኖስ ላይ ምትፈጽመው ጥቃት ከአሜሪካ ጋር ጦርነቱን ለማቆም የምታደርገውን ድርድር አደጋ ላይ የሚጥል መሆኑን አስታውቃለች።

    የተኩስ አቁሙ ይፋ ከሆነ በኋላ የእስራኤል ጦር ወደ አገሪቱ ሰሜናዊ ክፍል የተተኮሱ ተወንጫፊዎችን ማክሸፉን አስታውቋል።

    ሄዝቦላህ በደቡባዊ ሊባኖስ የሚገኙ የእስራኤል ኃይሎች ላይ ጥቃት መፈጸሙን የገለጸ ሲሆን፣ እስራኤል በበኩሏ ከባድ ጥቃት ማድረሷን አስታውቃለች።

    የሊባኖስ ጤና ሚኒስቴር እስራኤል በጃባል አመል ሆስፒታል አጠገብ የሚገን ሕንጻ ላይ ሰኞ ከሰዓት ጥቃት ከፈጸመች በኋላ አራት ሰዎች መገደላቸወን እና 127 መጎዳታቸውን አስታውቋል።

    ከተጎዱት መካከል 39 የሆስፒታል ሠራተኞች የሚገኙበት ሲሆን፣ አራቱ በአስጊ ሁኔታ ውስጥ ናቸው ተብሏል።

    የእስራኤል ጦር በአካባቢው የሚገኝ “የአሸባሪው ሄዝቦላህን መሠረተ ልማት” ማጥቃቱን ገልጾ፤ በሆስፒታሉ ላይ ጉዳት ቢደርስም “ዒላማ አልነበረም” ሲል አስተባብሏል።

    ሄዝቦላህ ሰላማዊ ሰዎች መሠረተ ልማቶች እና ሕዝብ በሚኖርባቸው ቦታዎች ላይ ይሸሸጋል ሲል ማስረጃ ሳያቀርብ ይወነጅላል።

    የሊባኖስ ጤና ሚኒስቴር በበኩሉ ባለፉት ሦስት ወራት ብቻ 128 የድንገተኛ አደጋ ሠራተኞች እና የጤና ባለሙያዎች መገደላቸውን በአምቡላንሶች እና በሕክምና ተቋማት ላይ ደግሞ 159 ጥቃቶች መፈጸማቸውን አስታውቋል።

    ሚኒስትሩ አክሎም ጦርነቱ ከተጀመረ ጊዜ አንስቶ 3,468 ሰዎች መገደላቸውነ የገለጸ ሲሆን፣ ቁጥሩን ግን ሰላማዊ ሰዎችን እና ተዋጊዎች አልለየም።

    የተባበሩት መንግሥታት በበኩሉ የእስራኤል ጦር ከአገሪቱ አንድ ስምንተኛ አካባቢ ነዋሪዎች ከመኖሪያቸው ለቅቀው እንዲወጡ ካስጠነቀቀ ወዲህ 1 ሚሊዮን ሰዎች መፈናቀላቸውን ገልጿል።

    እስራኤል 25 ወታደሮቿ እና አራት ሰላማዊ ሰዎች በዚህ ጦርነት ወቅት መገደላቸውን አስታውቃለች።

    

    የፎቶው ባለመብት, Reuters

13. 3 ሰኔ 2026የተኩስ አቁም ድርድሩ በተደናቀፈበት ሁኔታ አሜሪካ እና ኢራን ጥቃት መፈጸማቸውን አስታወቁ

    

    የፎቶው ባለመብት, X/US Central Command

    የአሜሪካ ጦር በኢራን ደሴት ላይ ‘ራስን የመከላከል’ ጥቃት መፈጸሙን እና ወደ መርከቦች እና የባሕረ ሰላጤው አገራት የተተኮሱ ሚሳዔሎች እና ድሮኖችን መትቶ መጣሉን አስታወቀ።

    የአሜሪካ ማዕከላዊ ዕዝ (ሴንትኮም) በሆርሙዝ ወሽመጥ እና ኣለይ በቄሸም ደሴት ላይ “ኢራን ወደ መካከለኛው ምሥራቅ አገራት ልትፈጽም የነበረውን የጥቃት ሙከራ ተከትሎ” ጥቃት መሰንዘሩን አስታውቋል።

    ኢራን ወደ ኩዌት ሁለት ሚሳዔሎችን ማስወንጨፏን ነገር ግን የታለመላቸውን ስፍራ ሳይደርሱ መውደቃቸውን እንዲሁም ሦስት ወደ ባሕሬን የተወነጨፉ ደግሞ በአየር ላይ እንዲከሽፉ መደረጋቸውን ገልጿል።

    የኢራን አብዮታዊ ዘብ በበኩሉ በቄሸም ደሴት በሚገኝ የግንኙነት ማማ ላይ ለተፈጸመ ጥቃት በሰጠው ምላሽ በቀጣናው የሚገኙ የአሜሪካ የጦር ሰፈሮችን እና ሂሊኮፕተሮችን ማጥቃቱን በአገሪቱ መገናኛ ብዙኃን በኩል አስታውቋል።

    ሴንትኮም በቄሸም ደሴት ላይ የተፈጸመው ጥቃት የኢራን ጦር የምድር መቆጣጠሪያ ጣቢያ፣ ኢራን “በቀጣናው ውሃዎች ላይ የማለፍ መብት ያላቸው ሰላማዊ ባሕረተኞች” ላይ የተኮሰቻቸውን ሦስት ድሮኖችን መትቶ መጣሉን አስታውቋል።

    አብዮታዊ ዘቡ “የሆርሙዝ ወሽመጥን ደኅንነት ማወክ ጠብ አጫሪውን የአሜሪካ ጦር ከባድ ዋጋ ያስከፍለዋል” ሲል በመግለጫው ላይ አስታውቋል።

    ኢራን በተደጋጋሚ የአሜሪካ ጦር ሰፈሮች በሚገኙባቸው ባሕሬን እና ኩዌት ላይ ጥቃቶቸን ፈጽማለች።

    ቀደም ሲል ሴንቲኮም አሜሪካ የጣለችውን እገዳ ተከትሎ ወደ ኢራን እየቀዘፈ የነበረ ነዳጅ ጫኝ መርከብን ማጥቃቱን እና እንዳይንቀሳቀስ ማድረጉን አስታውቋል።

    የአሜሪካ አየር ኃይል የቦትስዋናን ሰንደቅ ዓላማ የሰቀለ ነዳጅ ጫኝ መርከብ በተደጋጋሚ የተሰጠውን ማስጠንቀቂያ ችላ ማለቱን ተከትሎ በሞተሩ ላይ ጥቃት መፈጸሙን ተገልጿል።

    ሴንቲኮም ማክሰኞ ዕለት መርከቦ ላይ ጥቃት ሲፈጽም የሚያሳይ ተንቀሳቃሽ ምሥል ያሠራጨ ሲሆን የኢራን ጦር በይፋ የሰጠው ምላሽ የለም።

    ዕዙ በመግለጫው ከአውሮፓውያኑ ሚያዝያ 13 ጀምሮ አሜሪካ ወደ ኢራን ወደቦች የሚደረጉ እንቅስቃሴዎችን ማገዷን አስታውሶ፣ ከዚያን ጊዜ ጀምሮ 122 መርከቦች አቅጣጫቸውን አንዲቀይሩ እና እንዲመለሱ መደረጋቸውን አሻፈረኝ ያሉትም ሞተራቸው እነዳይሠራ መደረጉን አስታውቋል።

    ቢቢሲ የቦትስዋናን መንግሥት አስተያየት ለማግኘት ቢሞክርም አልተሳካም።

    አሜሪካ ይህንን ጥቃት የፈጸመችው የውጭ ጉዳይ ሚኒስትሩ ማርኮ ሩቢዮ በአገሪቱ ምክር ቤት ለመጀመሪያ ጊዜ ቀርበው ስለ ኢራን ጦርነት ከተጠየቁ በኋላ ነው።

14. 2 ሰኔ 2026ኢራን ሠራዊቷ መጠናከሩን ስትገልጽ፣ እስራኤል ደግሞ የኢራን መንግሥት መሠረቱ ተናግቷል አለች

    

    ኢራን የጦር ሠራዊቷ ከጦርነቱ በኋላ የበለጠ መጠናከሩን ስትገልጽ፣ እስራኤል ደግሞ የኢራን መንግሥት ክፉኛ ተዳክሞ ሊወድቅ መቃረቡን ጠቅላይ ሚኒስትሯ ተናገሩ።

    የኢራን ሠራዊት የተኩስ አቁም በተደረገበት ጊዜ በሁሉም መስኩ ለውጊያ ዝግጁ የሚያደርጉ ሥራዎችን ሲያከናውን መቆየቱን የአብዮታዊው ዘብ ቃል አቀባይ ገለጹ።

    ሁሴን ሞሄቢ እንደተናገሩት "በተኩስ አቁሙ ወቅት የሠራዊታችን ተልዕኮ የመፈጸም አቅም ጨምሯል፣ በተፈጠረው ዕድልም የውጊያ አቅሙ፣ ጥንካሬው፣ ዝግጁነቱ እና አደጋን የመቋቋም ብቃቱ ተጠናክሯል። በአሁኑ ወቅትም ጦሩ ቀደም ሲል ከነበረው አቋም በተሻላ ሁኔታ ላይ ይገኛል” ብለዋል።

    ይህ በእንዲህ እንዳለ የእስራኤሉ ጠቅላይ ሚኒስትር ቤንያሚን ኔታኒያሁ የኢራን መንግሥት በደረሰበት ጥቃት መሠረቱ መናጋቱን እና መውደቁ የማይቀር መሆኑን በኤክስ ገጻቸው ላይ ጽፈዋል።

    ጠቅላይ ሚኒስትሩ "የዚህ የሽብር አገዛዝ መሠረቱ ተናግቷል” በማለት “አገዛዙ ከዚህ በኋላ ቀድሞ ወደነበረበት ደረጃ ፈጽሞ አይመለስም፤ መውደቁ እንደማይቀር እነግራችኋለው” ሲሉ የኢራን መንግሥት መዳከሙን አመልክተዋል።

    የእስራኤሉ ጠቅላይ ሚኒስትር ይህንን አስተያየት የሰጡት የኢራን ጠቅላይ መሪ ሞጅታባ ኻሜኒ በተመሳሳይ እስራኤል ክፍኛ መዳከሟን ከተናገሩ በኋላ ነው።

    ጠቅላይ መሪው በቅርቡ ባስተላለፉት መልዕክት “አስራኤል መጪዎቹን 15 ዓመታት አታይም” በማለት ትጠፋለች የሚል አስተያየት ሰንዝረዋል።

    እስራኤል በኢራን ላይ ሁለት ጊዜ ጥቃቶችን የፈጸመች ሲሆን፣ ኢራን በበኩሏ ከባድ የአጸፋ ምላሽ በሚሳዔሎች እና በድሮኖች ፈጽማለች።

    ባለፈው የካቲት እስራኤል ከአሜሪካ ጋር አብራ በኢራን ላይ በፈጸመችው ጥቃት የኢራን ጠቅላይ መሪን ጨምሮ በርካታ የአገሪቱ ባለሥልጣናት ተገድለዋል።

    ኢራንም በበኩሏ በእስራኤል እና በአካባቢው ባሉ የአሜሪካ አጋሮች ላይ ተከታታይ የሚሳዔል እና የድሮን ጥቃቶችን በመፈጸም ከባድ ጉዳትን አድርሳለች።

15. 2 ሰኔ 2026ፕሬዝዳንት ሩቶ በአሜሪካ የሚቋቋመውን የኢቦላ ህክምና ማዕከልን ሲደግፉ ፍርድ ቤት ዕግዱን አራዘመ

    

    የፎቶው ባለመብት, Getty Images

    የኬንያው ፕሬዝዳንት ዊሊያም ሩቶ ተቃውሞ የገጠመውን የኢቦላ ተጠርጣሪዎችን ለመለየት የሚያስችል ማዕከል ለማቋቋም ከአሜሪካ ጋር የተደረሰውን ስምምነት ቢደግፉም የአገራቸው ፍርድ ቤት ግን በማዕከሉ ላይ የጣለውን ዕገዳ አራዘመ።

    ላይኪፒያ በተባለችው የኬንያ ማዕከላዊ ግዛት ውስጥ የሚከፈተውን የህክምና ማዕከል በመቃወም ከተካሄደው ሰልፍ ጋር በተያያዘ ሁለት ሰዎች መገደላቸው ተዘግቧል።

    ፕሬዝዳንቱ ከአሜሪካ ጋር የሚቋቋመው የህክምና ማዕከል ኬንያውያንን ጭምር የሚጠቅም የጋራ ስምምነታቸው አካል መሆኑን እና ኬንያ ተላላፊ በሽታዎችን ለመከላከል እንዲሁም ህሙማንን ለማከም የሚያስችላት መሆኑን በመጥቀስ ተከራክረዋል።

    ፕሬዝዳንቱ ይህንን በተናገሩበት ጊዜ የኬንያ ከፍተኛው ፍርድ ቤት ከአሜሪካ እና ከሌላ ከማንኛውም የውጭ መንግሥት ጋር በሚደረግ ስምምነት የሚመሠረት እና ሥራ ላይ የሚውል የኢቦላ ህሙማን መለያ ተቋምን የሚያግደውን ጊዜያዊ ውሳኔውን አራዝሟል።

    ፍርድ ቤቱ ዛሬ ባስተላለፈው ውሳኔ የኬንያ መንግሥት በሰባት ቀናት ውስጥ ከአሜሪካ መንግሥት ጋር የተደረሰውን አወዛጋቢ ስምምነት ይፋ እንዲያደርግ አዝዟል።

    በተጨማሪም መንግሥት እና ሌሎች አካላት “ጉዳዩ በፍርድ ቤት እልባት እስኪያገኝ ድረስ የኢቦላ ለይቶ ማቆያ ማዕከል ከመክፈት፣ ሥራ ከማስጀመር፣ ፈቃድ ከመስጠት እና ከማጽደቅ እንዲታቀቡ” ውሳኔውን አጽንቷል።

    የለይቶ ማቆያ ማዕከሉ ይቋቋምበታል በተባለው በማዕከላዊ ኬንያ ናኙኪ ከተማዋ ውስጥ ውጥረት የተፈጠረ ሲሆን፣ በመቶዎች የሚቆጠሩ ነዋሪዎች የህክምና ማዕከሉ ሊያስከትል የሚችለውን ተጽእኖ በመጥቀስ አደባባይ ወጥተው ተቃውሟቸውን ገልጸዋል።

    በተቃዋሚዎች እና በፖሊስ መካከል በተፈጠረው ግጭት ሁለት ሰዎች በጥይት ተመትተው መሞታቸው ተዘግቧል።

16. 2 ሰኔ 2026ተመድ እስራኤል የሊባኖስን አምባ መቆጣጠሯን በተመለከተ አስቸኳይ ውይይት አካሄደ

    

    የፎቶው ባለመብት, EPA-EFE/REX/Shutterstock

    የተባበሩት መንግሥታት የፀጥታው ምክር ቤት እስራኤል የሊባኖስን ጥንታዊ አምባ - ቢውፎርትን በቁጥጥር ሥር ማዋሏን በተመለከተ ትናንት አስቸኳይ ውይይት አካሄደ።

    በተመድ የሩሲያ አምባሳደር ቫስሊ ነቤንዝ “እስራኤል እና ሊባኖስ በአሜሪካ አሸማጋይነት የደረሱት የተኩስ አቁም ስምምነት እስራኤል ሊባኖስ ላይ ጥቃት እንድትፈጽም ከለላ ሰጥቷል” ብለዋል። ሊባኖስ የጋዛ ሰርጥ እጣ ፈንታ እንደሚጠብቃትም አክለዋል።

    በተመድ የፈረንሳይ ልዑክ ጀሮም ቦንፎን ውይይቱ እንዲካሄድ አገራቸው ጥሪ ማቅረቧን ጠቅሰው “እስራኤል ራሷን የመለካከል መብት ቢኖራትም ሊባኖስ ላይ የምታደርሰው ጥቃት ምክንያታዊ አይደለም” ብለው ንግግር አድርገዋል።

    በሺዎች የሚቆጠሩ ንጹኃን እንደተጎዱ እና እንደተፈናቀሉ የፈረንሳዩ ተወካይ ተናግረዋል።

    የአሜሪካ ተወካይ ማይክል ጄ ዋልዝ በበኩላቸው፤ድርድርን ጨምሮ ዲፕሎማሲያዊ ጥረቶች መቀጠላቸውን ገልጸዋል።

    “ሕጋዊው የሊባኖስ መንግሥት በቴህራን ከሚደገፈው አሸባሪ አገሪቱን ነጻ ለማውጣት ተነሳሽነት አሳይቷል” ብለዋል።

    የሊባኖስ ተዋካይ አሕመድ አራፋ ደግሞ መንግሥታቸው ነገሮችን ለመቆጣጠር ቢሞክርም “እስራኤል እንደ ሁልጊዜው ቀጣናዊውን ሁኔታ እየተጠቀመችበት ነው” ብለዋል።

    እስራኤል ሐኪሞችን፣ ሆስፒታሎችን፣ ጋዜጠኞችን፣ ትምህርት ቤቶችን እና የፀጥታ ተቋማትን ዒላማ በማድረግ “ስልታዊ የውድመት ዘመቻ” መክፈቷንም ጠቅሰዋል።

    በተመድ የእስራኤል ልዑክ ዳኒ ዳኖን “አንድ ቀን ተነስተን ሊባኖስ ለመግባት አልወሰንም። አማራጭ አጥተን ነው” ሲሉ ምላሽ ሰጥተዋል።

    ኢራን ሄዝቦላህን በእጅ አዙር መጠቀም መቀጠሏን ጠቅሰው፤ የተኩስ አቁም ስምምነት ላይ ቢደረስም “ሄዝቦላህ ሚሳዔል እና ድሮን መተኮስ” እንዳላቆመ ተናግረዋል።

17. 2 ሰኔ 2026በቀጣይ ሳምንት ከኢራን ጋር ስምምነት ላይ ሊደረስ እንደሚችል ትራምፕ ተናገሩ

    

    የፎቶው ባለመብት, Reuters

    ከኢራን ጋር የተኩስ አቁም ለማራዘም እና የሆርሙዝ ወሽመጥን ለመክፈት በቀጣይ ሳምንት ስምምነት ላይ እንደሚደረስ የአሜሪካው ፕሬዝዳንት ዶናልድ ትራምፕ ለኤቢሲ በሰጡት ቃለ ምልልስ ተናገሩ።

    “አሁን ላይ ነገሮች በጣም ጥሩ ናቸው። ውስን ችግር ነበር፤ ነገር ግን እንዳያችሁት በፍጥነት ፈትቼዋለሁ” ሲሉ በስልክ በሰጡት ቃለ ምልልስ ገልጸዋል።

    ትራምፕ ችግር ብለው የጠቀሱት እስራኤል በሊባኖስ ላይ የምታደርሰው ጥቃት ኢራንን ማስቆጣቱን ነው።

    ሄዝቦላህ በእስራኤል ላይ ጥቃት ማድረስ እንዲያቆም ከአሜሪካ የቀረበለትን ሐሳብ መቀበሉን ሊባኖስ አስታውቃለች። እስራኤልም በሊባኖስ መዲና ቤሩት ጥቃት ላለመፈጸም መስማማቷም ተገልጿል።

    ትራምፕ ከጠቅላይ ሚኒስትር ቤንያሚን ኔታንያሁ እና ከሄዝቦላህ ተወካዮች ጋር መወያየታቸውን ጠቅሰው “ተኩስ ለማቆም ተስማምተዋል” ብለዋል።

    ትራምፕ “ሄዝቦላህን አትተኩሱ ብያቸዋለሁ። ቢቢ [ኔታንያሁ] እንዳይተኩስም ነግሬዋለሁ። ሁለቱም ተኩስ አቁመዋል” ሲሉም አክለዋል።

    በቀጣይ ሳምንት የሆርሙዝ ወሽመጥ ይከፈታል ብለው እንደሚያምኑም ፕሬዝዳንቱ ተናግረዋል።

18. 2 ሰኔ 2026ሩሲያ በዩክሬን ከተሞች በፈጸመችው ጥቃት ቢያንስ 16 ሰዎች ተገደሉ

    

    የፎቶው ባለመብት, Getty Images

    ሩሲያ በዩክሬን ዋና ዋና ከተሞች ባደረሰችው ጥቃት ቢያንስ 16 ሰዎች እንደተገደሉ እና ብዙዎች እንደቆሰሉ ተገለጸ።

    በዲፕሮ ከተማ 11 ሰዎች ሲገደሉ 25 ሰዎች ተጎድተዋል። ዛሬ ንጋት ላይ በደረሱ ጥቃቶች በመዲናዋ ኪቭ አምስት ሰዎች መገደላቸው እና 51 መቁሰላቸውም ተዘግቧል፤ 35 ያህሉ ደግሞ ሆስፒታል ገብተዋል።

    የኪቭ ከንቲባ ቪታሊ ክሊሽኮ እንዳሉት ሁለት ግዙፍ የመኖሪያ ሕንጻዎች የተመቱ ሲሆን፤ ሰዎች በፍርስራሽ ሥር ተቀብረው ሊሆን እንደሚችል ይገመታል።

    ዩክሬን ባለፈው ወር የድሮን ድብደባ በመፈጸሟ በምላሹ “ስልታዊ ጥቃት” ለማድረስ ሞስኮ ስትዝት ቆይታለች።

    ሩሲያ በቁጥጥሯ ሥር ባዋለችው የዩክሬን ሉሀንስክ ግዛት በደረሰው የድሮን ጥቃት 21 ሰዎች ተገድለዋል።

    የኪቭ ከንቲባ ነዋሪዎች ከቤታቸው እንዳይወጡ ማስጠንቀቂያ ሰጥተዋል። “ጠላታችን በባለስቲክ ሚሳዔል ጥቃት እየፈጸመ ነው” ሲሉም ተናግረዋል።

    በአብዛኞቹ የዩክሬን ከተሞች የአየር ጥቃት ማስጠንቀቂያ ደወሎች እየተሰሙ ነው። በማዕከላዊ ኪቭ ጭስ መታየቱም ተገልጿል።

    በሌላ በኩል በሩሲያ ኢልስኪ የነዳጅ ማቀነባበሪያ የደረሰ ጥቃት እሳት ማስነሳቱ ተገልጿል።

    ኪቭ ውስጥ የበርካታ ድሮኖች እና ፍንዳታ ድምጽ እየተሰማ ይገኛል። ሞስኮ የፈጸመችው ጥቃት በነዳጅ ማደያ እሳት አቀጣጥሏል።

    

    የፎቶው ባለመብት, Reuters

19. 2 ሰኔ 2026ሄዝቦላህ በእስራኤል ላይ ጥቃት ማድረሱን ለማቆም መስማማቱን ሊባኖስ ገለጸች

    

    የፎቶው ባለመብት, Reuters

    ሄዝቦላህ በእስራኤል ላይ ጥቃት ማድረስ እንዲያቆም ከአሜሪካ የቀረበለትን ሐሳብ መቀበሉን ሊባኖስ አስታወቀች።

    እስራኤልም በሊባኖስ መዲና ቤሩት ጥቃት ላለመፈጸም መስማማቷም ተገልጿል።

    አሜሪካ የሚገኘው የሊባኖስ ኤምባሲ “አሜሪካ ሁለቱም ወገኖች ጥቃት እንዳያደርሱ ያቀረበችውን ምክረ ሐሳብ ሄዝቦላህ ተቀብሏል” ብሏል።

    የእስራኤል ጠቅላይ ሚኒስትር ቤንያሚን ኔታንያሁም ስምምነት ላይ መደረሱን አረጋግጠዋል።

    ሆኖም “ሄዝቦላህ ከተሞቻችን እና ዜጎቻችን ላይ ጥቃት ከፈጸመ ግን ቤሩትን እንደበድባለን” ሲሉ አስጠንቅቀዋል።

    የአሜሪካው ፕሬዝዳንት ዶናልድ ትራምፕ ከኔታንያሁ እና ከሄዝቦላህ ተወካዮች ጋር መወያየታቸውን ጠቅሰው “ተኩስ ለማቆም ተስማምተዋል” ብለዋል።

    እስራኤል በሊባኖስ የምታደርሰው ጥቃት የኢራን እና አሜሪካን የተኩስ አቁም ስጋት ውስጥ እንደሚጥል ቴህራን መግለጿ ይታወሳል።

    የሊባኖስ ኤምባሲ ባወጣው መግለጫ “ሄዝቦላህ እስራኤል ላይ ጥቃት ካልፈጸመ እስራኤልም በቤሩት ጥቃት እንደማታደርስ ተስማምተናል” ብሏል።

    የተኩስ አቁሙ በሒደት “ሌሎች የሊባኖስ አካባቢዎችን እንደሚሸፍን” ተገልጿል።

    ኔታንያሁ በበኩላቸው “የእስራኤል መከላከያ ኃይል በታቀደው መሠረት በደቡብ ሊባኖስ ዘመቻውን ይቀጥላል” ብለዋል።

    ሁለቱ ወገኖች ተኩስ ለማቆም መስማማታቸውን ትራምፕ ከገለጹ በኋላ የተወሰኑ ግጭቶች መነሳታቸው ተዘግቧል።

20. 1 ሰኔ 2026ፕሬዝዳንት ትራምፕ የአሜሪካ እና የኢራን ስምምነትን ለማረም ፍላጎት እንዳላቸው ተነገረ

    

    የፎቶው ባለመብት, Reuters

    ፕሬዝዳንት ዶናልድ ትራምፕ ከሦት ወራት በፊት የተጀመረውን የአሜሪካ እና ኢራን ጦርነት ለመቋጨት የሚያስችለውን ስምምነት ለማስተካከል ፍላጎት እንዳላቸው የዋሽንግተን መገናኛ ብዙኃን ዘገቡ።

    ለውጦቹ በሆርሙዝ ወሽመጥ እና የተብላላ የዩራኒየም አወጋገድ ጋር የተያያዙ እንደሆኑ በአሜሪካ የቢቢሲ አጋር የሆነው ሲቢኤስ ኒውስ ዘግቧል።

    ዋይት ሐውስ አስተያየት እንዲሰጥ ቢጠየቅም ምላሽ አልሰጠም።

    የኢራን ዋና ተደራዳሪ መሐመድ ባገር ጋሊባፍ እሑድ ዕለት የኢራን መብት ሙሉ ለሙሉ እስካልተጠበቀ ድረስ ቴህራን ምንም ዓይነት ስምምነት አትፈጽምም ብለዋል።

    የተኩስ አቁም ስምምነቱን ለማራዘም በሚያስችለው ማዕቀፍ ላይ ፕሬዝዳንት ትራምፕ እና ከፍተኛ ባለሥልጣናት ጋር አርብ ዕለት ለንግግር ቢቀመጡም፤ ስብሰባው ቀጣይ እርምጃዎች ላይ ግልፅነት ሳይኖረው ተጠናቋል። ሙሉውን እዚህ ያንብቡ ፕሬዝዳንት ትራምፕ የአሜሪካ እና የኢራን ስምምነትን ለማረም ፍላጎት እንዳላቸው ተነገረ