KALLATTIIN, Iraan humna waraanaa ishee daran cimuu yoo himtu, Israa'el mootummaan Iraan hundeen raafame jette

Haguuggii Tamsaasa Kallattii

1. Daqiiqaa 26 duraIraan humni waraanaa ishee daran cimuu himte, Israa'el mootummaan Iraan hundeen raafame jetti

   

   Iraan erga waraanni eegalee humni waraanaa ishee daran cimuu yoo ibsitu, Israa'el gamasheen mootummaan Iraan akkaan dadhabee yeroo ammaa hundeensaa raafameera jette.

   Humni waraanaa Iraan guyyaa dhukaasa dhaabuun labsamerraa eegalee gama hundaan akkaataa waraanaaf qophii ta'urratti of cimsaa jiraachuu dubbi himaan eegdota warraaqsaa ibseera.

   Huseen Moheebii ''yeroo waraana dhaabuun labsamu dandeettiin ergama raawwachuu loltoota keenyaa akkaan dabaleera. Carraa uumameen humni waraanuu, jabinni, qophiin fi dandeettiin balaa itti dhufu qolachuu isaa cimeera. Yeroo ammaa humni waraanaa keenya kan kanaan duraarra ga'umsa gaarii fi cimina olaanaarratti argama,'' jedhe.

   Ministirri Muummee Israa'el Beenjaamiin Neetaaniyaahuu ammoo mootummaan Iraan haleellaa isa mudateen hundeensaanii raafamuu fi kufuunsaa waan hin oolle ta'uu X irratti barreesseera.

   ''Bulchiinsichi [Iraan] bakka duraan turetti gonkumaa deebi'uu hin danda'u. Kufuunsaa mirkana ta'uu isinitti himuun barbaada,'' jedhe.

   MM israa'el kun erga hoogganaa olaanaan Iraan Mojtabaa Kaameenii Israa'el hunkutooftee badaa jiraachuu ibsanii booda yaada kana kenne.

   Mojtabaa Kaameenii ibsa dhiheenya kennan keessatti ''waggoota 15 booda Israa'el waan jedhamu hin arginu,'' jedhan.

   Ni dhabamti yaada jedhu kennan.

2. Sa'aatii tokko duraFilannoon Waliigalaa 7ffaa bifa dimokiraatawaafi hirmaaachisaa ta'een gaggeeffameera - Mana-maree Paartilee Siyaasaa Finfinnee

   

   Madda suuraa, FBC

   Filannoon Waliigalaa 7ffaa magaalaa Finfinnee keessatti bifa dimokiraatawaa fi hirmaachisaa ta'een gaggeeffamee milkiin xumuramuu Manni-Maree Waloo Paartilee Siyaasaa Finfinnee beeksise.

   FBCn akka gabaasetti, Manni-maree Waloo kun adeemsi sagalee kennuu Filannoo Waliigalaa 7ffaa xumuramuu hordofee sabaa-himaaleef ibsa kenneera.

   Manni-marichaa ibsa isaa kanaan filannichi walumaa galatti jalqabee hanga xumuramutti hordofii barbaachisaa gochaa akka ture ibseera.

   Walitti qabaan Mana-marichaa Maaruu Jaannee akka jedhetti, filannoo marsaa 7ffaa kanarratti jiraattonni magaalattii baayyinaan bahanii hirmaachuun paartii barbaadan bilisummaan filataniiru.

   Adeemsa filannichaa keessatti dubartoonni, dargaggoonni, maanguddoonni, hanqina qaamaa warri qaban walumaa galatti jiraattonni magaalattii naamusa gaariidhaan filannicha keessatti dammaqinsaan hirmaachuu isaanii dubbate.

   Adeemsi filannichaa magaalattii keessatti rakkoo nageenyaas ta'e seerri filannoo osoo hin cabiin karaa naga qabeessa ta'een goolabamuu ibseera.

   Haalli filannoo bu'a qabeessa ta'e magaalattii keessatti milkaa'e Finfinneen ijaarsa dimokiraasii moodeela (fakkeenya) ta'e ijaaruu akka dandeessu qabatamaan agarsiisteetti jechuun dubbate.

   Manni-marichaa milka'aina filannoo kanaatiif gahee gumaachaniif jiraattota magaalattii, Boordii Filannoo Biyyaalessaa, akkasumas qaamolee nageenyaatiif galata dhiyeesseera.

3. Sa'aatii tokko duraMeeshaaleen filannoo fi sagaleen kennaman naannolee filannootti walitti qabamaa jiru- Boordii Filannoo

   

   Madda suuraa, NEBE

   Itoophiyaatti filannoon waliigalaa marsaa 7ffaa kaleessa guyyaa guutuu gaggeeffamee kan oole yoo ta'u, guyyaa har'aa meeshaaleen filannoo fi sagaleen kennaman buufataalee filannoorraa gara naannolee filannootti walitti qabamaa jira.

   Erga sagalee kennuun xumuramee booda adeemsi sagalee walitti qabuu gaggeeffamaa jiraachuu kan ibse Boordiin Filannoo Itoophiyaa, haala waliigalaa adeemsa filannoorratti ibsa gaazexeessitootaaf kennuuf jedha.

   Filannoon kaleessa guyyaa guutuu gaggeeffamaa oolee fi boodarra hanga halkan keessaa sa'atii ja'aatti adeemsi sagalee kennuu itti fufe erga obba'ee booda, har'a buufataaleen filannoo bu'aa sagalee maxxansaa oolaniiru.

4. Sa'aatii 4 duraMormii Keeniyaa giddugala Iboolaa Ameerikaa irratti geggeeffameen namoonni lama ajjeefaman

   

   Madda suuraa, Getty Images

   Giddugaleessa Keeniyaa magaalaa Nyaanyuukii keessatti mormii Ameerikaan buufata waraanaa dhiyoo jirutti dhukkubsattoota Iboolaaf wiirtuu adda baafamuu dhaabuuf qabdu mormuun namoonni lama rasaasaan ajjeefamuu BBCn odeeffateera.

   Namoota miidhaman keessaa tokko naannoo buufata qilleensaa Layikipiyaa bakka mormiin kun itti geggeeffamaa tureetti rasaasaan rukutame. Hiriyyoota isaan gara hospitaalaa erga geeffamee booda lubbuun isaa darbe.

   Miidhamaan biraa rasaaaan rukutame yeroo loltoonni gara hospitaalaatti geessan dursee du'ee ture.

   Haalli ajjeechaa namoota kanaa ifa kan hin taane yoo ta'u, qondaaltonni dhimma kana irratti yaada hin kennine.

   Wixata kaleessaa mormitoonni dhibbaan lakkaa’aman daandii magaalattii keessa hiriira bahuun daandii cufanii fi gommaa gubuudhaan poolisiin isaan bittimsuuf gaazii imimmaanessu dhukaasaa ture.

   Ameerikaan keeniyatti wiirtuu wal’aansa Iboolaa hundeessuuf karoorfachuu hordofee, karoorri kun balaa daddarbiinsa daangaa qaxxaamuraa ilaalchisee yaaddoo ummataa kaaseera.

   Wirtuun kun lammiilee Ameerikaa weerara yeroo ammaa Rippabiliika Dimookiraatawaa Koongoo keessatti mul’ateen miidhaman yaaluuf kan yaadame ta’uun ibsameera.

   Keeniyaan hanga har'aatti nama Iboolaan qabame tokkollee hin galmeessine.

   Jimaata darbe Manni Murtii Olaanaa gareen mirga namoomaa dhaabbatichi fayyaa hawaasaa irratti ''balaa hamaa'' jechuun himannaa erga banee booda banamuu wirtuu kanaa mormeera.

5. Sa'aatii 6 duraNamicha of ajjeesuun dura miseensota maatiisaa jaha galafate

   

   Madda suuraa, Getty Images

   Ameerikatti namni qawwee hidhate tokko miseensota maatii isaa jaha, achiis ofii isaatti dhukaasuun galaafatee jedhe Poolisiin.

   Taateen kun kan raawwate, Wiixata kutaa bulchiinsa lowa gara bahaa magaalaa Muskatine jedhamu keessatti ture.

   Qorannoon poolisii jalqabaa akka agarsiisutti, dhimmichi walitti bu’iinsa maatii keessaatti uumame irraa kan madde ta’uu mala. Haa ta’u malee, wanti dhiiga dhangalaasuu maatii hanga kanaaf sababa ta’e hanga ammaatti ifatti hin ibsamne.

   Poolisoonni gabaasa dhukaasa qawwee dhaga'ame hordofuun sa’aatii walakkaa booda mana jireenyaa tokko keessatti reeffa namoota afur rasaasaan ajjeefamanii argan.

   Namni ajjeechaa kana raawwachuun shakkame kun osoo poolisoonni achi hin qaqqabin baqatee kan ture ta’us, yeroo gabaabaa keessatti nama maqaan isaa Riyan Willis kan umurii 52 fi jiraataa Muskatine ta’e adda baafame jedhe poolisiin.

   Boodarra immoo daandii miilaa qarqara laga irratti, riqicha namoonni irra deeman tokko biratti argamee ture.

   Haa ta'uu malee, wayita qondaaltonni isa hordofanii waliin haasa'aa jiranii of ajjeesuu poolisiin kan beeksiseera.

   Poolisiin miidhamtootni biroollee jiraachuu akka danda'an erga odeeffannoo agarteen booda sakkata'iinsa taasifameen reeffa namoota biroo lamaa rasaasaan rukutaman jedhamee amanamu argame.

   Reeffi nama tokko mana dhiyoo jiru keessatti, kan biraan immoo bakka daldalaa keessatti ture.

   Namoonni miidhaan irra gahe hundi maatii nama haleellaa raawwate ta'uun amanama . haa ta'uu mlee ammatti eenyummaan isaanii ifatti hin ibsamne..

6. Sa'aatii 7 duraIsraa’eliifi Hizboollaan dhukaasa dhaabuuf walii galanis lolli itti fufeera

   

   Madda suuraa, AFP

   Israa’elii fi Hizboollaan karoora Ameerikaatin waraana dhaabuu fudhachuu isaanii ibsanis, kibba Libaanos keessatti lolli itti fufee jira.

   Preezdaantiin Ameerikaa Doonaald Traamp gama lachuu waliin haasa'uu isaanii fi ''gama lachuutiin dhukaasa dhaabuun akka taasifamu waliigalaniiru'' jedhan.

   Tiraamp kana kan dubbatan, erga Iraan tarkaanfiin waraanaa Israa'el Libaanos keessatti fudhataa jirtu, dhukaasa dhaabuu amma Ameerikaa fi Iraan gidduutti taasifamaa jiruuf balaa ta'uu akeekkachiiftee booda.

   Libaanos akka jettetti Hizboollaan haleellaa Israa’el irratti raawwatamu dhaabuuf akkasumas Israa’el magaalaa guddoo Libaanos Beerutitti haleellaa akka hin rawwannee walgaleera.

   Ministirri Muummee Israa’el Beeniyaamin Netaaniyaahuun waliigaltee kana mirkaneessanii, garuu haleellaan Beerut irratti raawwatamu "yoo Hizboollaan magaalota keenya fi namoota nagaa haleeluu hin dhaabne" akka itti fufu akeekkachiisan.

   Netaaniyaahuun waraanni Israa'el ammallee kibba Libaanos keessatti akka socho'u ibsaniiru.Halkan edaas haleellaan heddu raawwatameera.

   Hizboollaan diroonii fi ''misaa'ela'' fayyadamuun taankii fi loltoota Israa'el naannoo gandoota lamaa kaaba Israa'el irratti haleellaa raawwachuu isaa ibseera.

   Waraanni Israa’el misaa'ela lama Libaanos irraa dhukaafaman to’achuu ibseera. Miidhaan gahes hin jiru jedhe.

7. Sa'aatii 8 duraFinfinneetti filannoon nagaan Xumuramuu Poolisiin magaalaa Finfinnee beeksise

   

   Madda suuraa, Addis Ababa Police

   Adeemsi kenniinsa sagalee filannoo waliigalaa 7ffaa nagaadhan xumuramuu isaa Qajeelcha Olaanaa Poolisii Finfinneetti Koomaand Poostiin Filannoo beeksiseera.

   Akka ibsa poolisiitti, adeemsi sagalee kennuu hanga halkan keessaa sa'aatii 7:00tti raawwatamaa akka ture eeruun, buufataalee filannoo magaalaa Finfinnee keessatti argaman hundatti adeemsi sagalee kennuu rakkoo nageenyaa tokko malee xumurameera jedhe.

   Haa ta'uu malee balaa tiraafikaatiin lubbuun namoota lamaa kan darbera jedhe.

   Yeroo ammaa lakkoofsi sagalee filannoo itti fufee akka jiru Ibsi poolisii kun eerera.

   Adeemsi hojii filannoo boodaa jiru haala naga-qabeessaa fi milkaa’ina qabuun akka itti fufuuf qophii taasisu itti fufuus ibse.

8. Sa'aatii 9 duraTiraamp walii galteen Ameerikaa fi Iraan torbee dhufu xumuramaa jedhu

   

   Madda suuraa, Reuters

   Pirezidaantiin Ameerikaa, Donald Trump, gaaffii fi deebii miidiyaa ABC waliin taasisaniin, waliigalteen Iraan waliin taasifamu kan dhukaasa dhaabuu dheeressuu fi ulaan Hormuz akka banamu taasisu ''torban muraasa dhufan keessatti'' ni mallattaa'a jedhanii akka abdatan ibsan.

   "Haalli yeroo ammaa baay’ee gaarii dha. Wanti hundi karaa sirrii irratti argama," jechuun gaaffii bilbilaan gaazexeessaa ABC waliin taasisaniin dubbatan.

   Tiraamp itti dabaluudhaan, "har’a rakkoon xiqqoon tokko uumamee ture. Garuu akkuma beektan saffisaan furreerra," jedhan.

   Akka Pirezidaantiin Ameerikaa jedhanitti rakkoon kun kan ka’e aarii Iraan haleellaa Israa’el Libaanos irratti raawwatte irraa kan madde ture.

   Tiraamp '' Hizbullah waliin dubbadhera. Rasaasa akka hin dhukaasne itti himeen jira. Akkasumas Netanyahu waliin dubbadheera, isaanis akka hin dhukaasne itti himera. Gareewwan lamaanis haleellaa isaanii dhaabaniiru."jedhan.

   Itti dabaluudhaanis, "kun hojii salphaa miti," jechuun ibsan. "Biyyi guddaan tokko waliigalteerra ga’uuf hojii irra jirti. Garuu jibbaa fi walitti bu’iinsi yeroo dheeraaf jiru waan ta’eef salphaa miti. Nuufis hojii salphaa miti, garuu wanta barbaannu argachaa jirra."

   Waa'ee xumuramuu fi mallatteessuu waliigaltee banamuu ulaa Hormuz ilaalchisee yeroo dubbatan: "Torban dhufu ni xumurama jedheen yaada." jedhan.

   Tiraamp ammallee wantoota biroo muraasni irratti walii galuu qaban akka jiru ibsan

9. Sa'aatii 9 duraRaashiyaa magaalota Yukireen irratti haleellaa cimaa banteen namoonni du'an

   

   Madda suuraa, Getty Images

   Raashiyaan haleellaa guddaa halkan edaa magaalota Yukireen irratti raawwattee yoo xiqqaate namoonni sagal yoo du'an heddu madaa'an.

   Kantiibaan magaalaa Kiiv Vitaalii Kilitschiko akka jedhanitti, gamoon manneen jireenyaa gurguddaan magaalattii keessatti argamu lama haleelamuufi namoonni gamoon irratti jijjigee jalatti hafan jiru.

   Haleellaa diroonii Yukireen mana baruumsaa magaala to'annaa Raashiyaa jala jirurratti gaggeessite jedhameen barattoonni 21 du'uu hordofee Raashiyaan haleellaa haaloo bahuu cimaa akka fudhattu torban tokko dura itti dhaadattee turte.

   Haleellaa misaa'eloota Raashiyaa irraa kan ka'e aarri guddaan magaala Kiiv keessaa samiitti ol ka'ee mul'ata.

   Raashiyaatti ammoo haleellaa diroonii Yukireen buufata boba'aa calalu irratti gaggeessiteen abiddi qabachuun qondaalonni himan.

   Pirezidaantiin Yukireen Voloodmiir Zeleniskii Wiixata ibsa kennaniin, Raashiyaan haleellaa guddaaf qophaa'aa waan jirtuuf lammiileen of eeggannoo akka taasisan ergaa dhaamanii ture.